Ka jaka ot doh kaba la tip kum ka ‘Modern Bi-Species Abattoir’ Demthring West Jaiñtia Hills District ïa kaba la dep plie paidbah da u bah A.L. Hek (MLA) uba dei ruh u myntri ka tnad AH & Veterinary haka 19 tarik u Nohprah 2023, ka la sdang treikam mynta ka sngi 27 tarik u Rymphang da kaba ai ka jinghikai kyrpang ïa ki nongot doh.
Kane ka rukom ot doh katkum ka juk ba thymmai la leh mynta ka sngi da ki nongot doh, ha ryngkat ka jingdonlang ki Doctor na ka tnad Veterinary West Jaiñtia Hills, ki nongïalam ka seng nong ot doh ka Jaiñtia Livestock Butcher Welfare Association (JLBWA) bad ki dkhot ka Khasi Jaintia Butcher Welfare Association, Shillong kiba la wan khnang ban ai jinghikai kyrpang ïa ka rukom ot doh hapoh kane ka ïing ot doh kaba don ha Demthring.
Naka liang ka Dr. Weimanhi Tyngkan ba dei khmih kum ka Mobile Veterinary Dispensary Amlarem kala ïathuh kum ki doctor na ka tnad Veterinary kin wan jurip shwa ïa ka jinglong jingman bad ka koit ka khiah jong ki mrad (masi bad sniang) hashwa ban ot doh ïa ki.
Ki Doctor kin peit ruh naduh ka jingïaid jingïeng jong ki mrad, ki jingmih jong ki ummad na ki khmat bad ki khmut bad ka jingshit ha ka met, ha dien ba lap ba ki mrad ki long kiba khoit ba khiah yn shah ban ot doh ïa ki hapoh kane ka jaka.
Shuh shuh kala ong hadien bala dep ot doh, kin sa leh sa ka post mortem kata ban jurip bniah ïa ki dohjem kum ki klong snam, ki khyllai bad lada ym shem lap kino kino ki jingpang ka jingot ïa ka doh kan ïaid beit shakhmat haduh ban da ioh ban pynïaid ïew ïa ka doh.
Na ka liang ki nongïalam ka seng die doh ka Jaiñtia Livestock Butcher Welfare Association kata naduh u President ma Limba Dkhar, u Vice President ma Livis Pyrtuh bad u Secretary ma D. Ryngkhlem kila pynpaw ka jingsngewnguh kaba khraw eh ïa ka sorkar kaba la wanrah ïa kum kane ka projek ot doh kaba long katkum ka juk ba mynta.
Kila pynsngew ba ka jingdon jong kane ka jaka ot doh hapoh ka West Jaiñtia Hills District kan ïarap shibun eh ban pynkloi ïa ka rukom ot doh ha ka jingkhuid jingsuba, da ka jingkyrmen skhem ba ïoh pynpoi ïa ka doh sha ki paidbah nongbam haka rukom kaba khuid ba suba.
U President ka Khasi Jaintia Butcher Welfare Association bah Generos Warlarpih ha ka jingkren sha ki lad pathai shubor ula pynsngew kum ka kynhun kaba la shimti da ka sorkar ban pynïaid ïa ka jaka ot doh ha Shillong, mynta ka sngi kila wan khnang sha kane ka jaka ha Demtriang ban ai jinghikai ïa ki nong ot doh katkum ka juh ba mynta.
Ha kane ka sngi la donlang naduh u SDBO ka Amlarem ma G. L Niang, u Executive Engineer Veterinary Jowai bah K. Mawlong nalor kiwei kiwei de. Ïa kane ka jaka ot doh jong ka tnad Animal Husbandry & Veterinary, ka sorkar jylla la pyntrei da ka Chennai Abattoir Pvt. Ltd. & Rishan Rapsang, kaba la bei pisa da ka sorkar kmie haka jinglu kab kot T.7.83 klur tyngka.
