Ka Jaiñtia National Council JNC – Jalaphet Circle mynta ka sngi ka 11/09/2024 ka la leit ban ujor pyrshah iaki nongdie dukan hapoh u pud u sam ka shnong Jalaphet halor ka jingdie ba palat por (expiry date) iaki mar bam mar dih ha ka Assistant Commissioner of Food Safety, East Jaiñtia Hills District.
Ka seng hapoh ka jingialam u President ka Circle u samla Andy Bareh bad u General Secretary u Giken Langstang kila ai da ka dorkhas haka Assistant Commissioner ka Food Safety ka kong Ayesha B Tyngkan hadien ba lah ioh iaki jingujor naki nongshong shnong ka shnong bad ka thaiñ ba bun naki dukan ki pyndonkam bad die daki mar ba palat por (expiry date) sha ki paidbah bad kane ka jingleh jong kine ki dukan ka long ka bym lah ban pdiang namar kane kan wanrah iaka jingktah haka koit ka khiah.
Ka seng haka jingthoh ka pynpaw ba kum ka shnong kaba dang duna haka stad ka tip ka long kaba ma eh iaki nongshong shnong namar kim da nang bha ban peit ne pule bha iaki mar kiba lah palat ka por bad kane hi ka wanrah ym tang ka jingduh nong haka pisa tyngka bad kan wanrah ruh ka jingma kaba khraw haka koit ka khiah khamtam iaki khynnah bad kiba la noh ka rta. Ka seng ka pynpaw ruh ba ka jingduna haka jingnang ka jingtip iaki mar balah palat por ka pynlong iaki nongshong dukan bakin shim kabu.
Naka por sha ka por ka juh don ka jingpeitngor bad ka jingmaham naka seng bad naka shnong ruh kumjuh hynrei kine ki jaitkam ki iai jia shi iai jia bad kane hi ka pynbitar iaka seng bad ka pynsniewdur ruh iaka imlang ka sahlang, ki mar bala kut por ym tang ki ktah iaka khuid ka suba ka Shnong hynrei ki pynkha ruh iaki jait jingpang ba bunjait namar ka jingbret pathar bad pyntreikam iakum kine ki mar kalah ban ialam sha ka jingma haka liang ka koit ka khiah ki nongshong shnong.
Ka seng ka kyrpad jur iaka Commissioner ba dei ban shimkhia iakane ka kam bad ban leh ruh da kaba tyngeh ia kine ki dukan kat kum ka aiñ. Ka seng ka kyntu ruh iaka tnad treikam ba kadei ban leit jurip iakine ki jaka man laka por bad ban leit khynra ruh iaki godown Jong ki khnang ban lap iaka jingshisha, ba lada lap ia kino kino kiba leh iakum kine ki jaitkam dei ban pynshitom jur iaki.
Naka liang ka commissioner kala kular ban shim khia ia kane ka kam bad kan sa leh ruh ia kaba dei hok ban leh khnang ba kan nym don kano kano ka jingktah ne ka jingduh nong iaki nongshong shnong bad kala kular ruh ban pynshitom ia kino kino kiba leh ia kum katei ka kam kaba wanrah iaka jingbym shngain haka koit ka khiah.
Naka liang ka seng ka dap daka jingsngewnguh iaka Commissioner baka la kloi ban shim khia halor kane ka kam bad ka seng ka ai ruh ka kti ka mon ka kti ka diang ban iatreilang bad ka tnad ha kano kano ka por naka bynta ka bha ka miat jong ki ba bun balang.