Ka Jaiñtia Women Council (JWC) jong ka East Jaiñtia Hills District, ha ka sngi ba ar ka la leit buh da ka jingujor sha ka Human Rights Commission ha Shillong ha kaba ïadei bad ka jingpynsngew paidbah ne Public Hearing kaba la long ha ka 18 tarik u Lber, 2024, ha kaba ïadei bad ka jingthmu ban shna ïa ka Karkhana Meghatop Cement Pvt. Ltd, kaba don ha shnong Wahiajer Elaka Narpuh, East Jaiñtia Hills District.
Ki nongialam bad ki dkhot jong ka JWC, ki la pynpaw ba wat hadien ba ki la dep ban pan jingbit na u Deputy Commissioner ka EJHD ban iashim bynta ha katei ka sngi pynlong ia ka public hearing, ha kaba na ka liang jong u DC ruh u la dep ban ai jingbit. Hynrei ka long pynban da khongpong mar shwa ban poi ha katei ka jaka, la khang ia ki nongialam bad ki dkhot jong ka Council ban rung shapoh katei ka jaka da ki paidbah bad ki pulit. Nalor kata la buh ruh ia ka jingkhang kali ha Umtyra ban pynslem bad pynthut ia ka jingwan jong ki dkhot jong ka WJC bad kiwei de ki seng ba mut ban leit pynpaw ia ka jingpynsngew ka jong ki hala ka jong ka jong ka jingsngew.
Ka WJC ka kynnoh ba kine ki jingleh bad jingthmu jong ki bor District ban pynsngap jar ia ka sur jong ki, kala pynduh ia ka hok jong ki ban kren bad pynpaw laitluid ha kano kano ka public hearing. Ka WJC ka la ong ba kane ka long ka jingleh donbor haka shynshar khaddar, ym dei shuh ka synshar paidbah ka dei kum ka jingsynshar donbor (Dictatorship). Kumta ka JWC ka la buh ka jingkyntu ia ka Human Rights Commission ban tuklar ia katei ka kam leh donbor, na ka bynta ka hok jong ki paidbah ne kino kino ki kynhun hapoh katei ka District.