Ka Hynniewtrep Border Dispute Redressal Forum (HBDRF) hapoh ka jingialam jong u Chairman, Chandame Sungoh bad u Nongaiktien u Bah Thomas Passah ha ka 07 tarik Kyllalyngkot 2025 ki la wan ai da ka jingujor sha ka Meghalaya Human Rights Commission halor ka jingiakynduh jingeh jong ki Nongshong shnong kiba sah ha ki thaiñ Block 1 bad ka jingshah leh beiñ ha ka hok longbriew man briew.
Haba kren sha ki lad pathai khubor na ka liang u Chairman ka Hynniewtrep Border Dispute Redressal Forum u Bah Chandame Sungoh u la ong ka jingwan ai jingujor jong ngi sha ka Human Rights Commission ka dei halor ka jingshah knieh noh ia ka hok longbriew bad 3 tylli ki mat kiba la shah pynkheiñ kum ka hok longbriew manbriew.
Kaba nyngkong ka dei halor ka jingshahknieh noh ki jaka ki puta jong ngi kiba dei ki hok longtrai man trai jong ngi da ka sorkar Assam ha ka por ba thaw ia ka District Council ha u snem 1952.
Kaba ar pat ka dei ka jingshah lehbeiñ jong ngi ha ki ba bun ki liang naduh ba shah pynhap sha ka Karbi Anglong Autonomous District Council, ia ngi ki paid khasi Pnar kiba shnong ba sah ha kane ka jaka kim kheiñ briew shuh bad la long shisha kum kita ki mrad, ka jingshah lehbeiñ ym dei tang na ka liang ka Sorkar hynrei naduh ka snem 1997,1998 bad haduh ka snem 2016, hapdeng kine snem ka jingim jong ngi ki briew kiba sah hangtei ka long kaba kordit shisha haduh kata kata. Ka jingmih jong ki kaikhlaw Karbi kiba ngi tip kum ka Karbi National Volunteer (KNV), Karbi People Liberation Tiger (KPLT) bad sa kawei pat ka United Democratic People Solidarity (UDPS).
“Hapoh kine ki 10-15 Snem ka jingeh jong ngi ka long haduh kata kata bad ka jingshah lehbeiñ ka long haduh kata kata, kine ki kaikhlaw ki dawa na kawei pa kawei ka thliew ïing man la u snem la hap siew ia ka house tax bad kiba kham don kham em ki hap siew ia ki khajana kaba heh kaba man la u snem ha kawei pa kawei ka kynhun seng lehnoh”.
Ka mat ka balai ka dei halor ka jingbym ioh Ia ki lad pynroi namar kumba long mynta baroh ki paidbah nong shnong shong ka ri India ki la ioh ia ki surok, ka umbam umdih, ki skul, ki jaka sumar ba biang bad kiwei kiwei de ki kam pynroi hynrei kine ki paidbah nong shong shnong kiba sah ha ki thaiñ khappud kiba don haduh 27 lane 28 tylli ki shnong kim ioh ia ki kam pynroi bad ki dang sahdien ki paidbah ki mat ia ka jingeh bad kordit haduh katta katta dei na kane ka daw ngi na ka liang ka forum ngi la leit ai jingthoh ne ka jingujor sha ka Human Right Commission.
Ha kine ki khyndiat sngi ba la leit ruh ngi iohi ba ki karbi kaba tip kum kyrteng ka Karbi Student Association ki la leit rung shapoh shnong Lapangab bad ki la pynbor ia ki nong shong shnong ka Lapangab ban Register ia ki lyngkha rep kba jong ki sha poh ka Karbi Autonomous District Council hapoh ka jylla Assam bad ban siew ruh ia ka khajna.
Na ka liang u Bah Thomas Passah Nongiaktien jong ka Hynniewtrep Border Dispute Redressal Forum u la ong , “wat hapdeng ka jingiakren pynbeit pud ka dang don ka jingpynbor pat na ka liang ka Karbi ban Register ia ki khyndew ki shyiap ki nongshong shong shapoh Karbi bad hap siew khajna shapoh Karbi, u la ong ba lada don shisha kata ka jingpynbeit pud ba kam dei shuh ban don kum kine ki jait jingpynbor bad ngi shaniah ha ka Human Right Commission ban tuklar ia kine ki jingeh ki paidbah, khnang ba ka jingeh jong kine ki Nongshong shnong kan jah noh, bad ki la pyntip ba kin sa khot ia ka hearing bad ngin sa pynshai ia ki bad lada donkam ban wan ialam ia ki briew na Block 1 kiba dei ki sakhi ia ka jingjia kaba bun ma ki ruh kin wan”.
U la bynrap “Na ka liang ka Human Rights Commission ka dei ban shimkhia ba ka jingeh jong kine ki briew kan jah noh namar ka Constitution jong ka Ri India ka ai ka hok ban im phi sah ha Block 1, sah ha Assam ne ha Shillong, ka Constitution jong ka Ri India ka ai hok ban ioh ia ka umbam kaba khuid, ban ioh ia ka jingsumar kaba biang, ban im shngaiñ ha la ka jong ka jaka ha la jong ka ïing”, pynkut u Bah Thomas Passah.