Ka Federation of Jaintia People (FJP), Jaintia Hills District, kala ai jingthoh sha ka Meghalaya State Pollution Control Board (MSPCB), lyngba u Deputy Commissioner ka East Jaintia Hills District ban pynpaw ka jingpyrshah ia ka jingthmu khot Public Hearing na ka bynta ka karkhana pynmih dewbilat ba thymmai ka M/s Shree Cement Pvt. Ltd, ha shnong Daistong.
Ka FJP ka pynpaw ba ka jingwan rah ia ki Company pynmih dewbilat na ka por sha ka por ha ri lum Jaintia, ka wanrah ia ka jingktah ia ka long ka man ka mariang kaba ktah shibun ia ka koit ka khiah ki nongshong shnong, kumjuh kine ki karkhana kim ju lah ban ai kam ai jam pura ia ki trai ri trai muluk bad ka wanrah pynban ka jingbun jong ki nongtrei kiba wan nabar ka jylla.
Kumta na ka liang ka seng lyngba u President jong ka u Thimothi Pala kila kyntu ia ka MSPCB ban pynsangeh shisyndon ia kane ka jingthmu ban pynlong ia ka Public Hearing ha ka 19 tarik mynta u bnai ha shnong Daistong, East Jaintia Hills District.
