Ka All Meghalaya Pharmacy Association hynne ka sngi ka 29 tarik Ïaiong ka la wan iakynduh ia ka Myntri ka tnad ka koit ka khiah ka Dr. Mazel Ampareen lyngdoh ban iakren halor ka jingsahteng katto katne ki mat na ka liang ka kynhun ka la dep ban pynsngew sha ka Myntri ha ki snem ba la dep.
Haba kren sha ki lad pathai khubor na ka liang u samla Emos John Syiemlieh u la ong hadien ka jingiakynduh mynta ka sngi bad i Myntri na ka liang ka kynhun ka la dep pynsngew shibun tylli ki mat; ka mat ba nyngkong ka dei halor ka Meghalaya Pharmacy Council bad ia kane na ka liang i Myntri in sa shim rai noh. Ka mat kaba ar ka dei halor ka jingkyrduh kam kyrduh jam; na ka liang i Myntri i pynpaw ba in sa pyllait advertisement noh shen ha ki bnai ban sa wan.
Shuh shuh u la ong haba iadei bad ka IPH Standard na ka liang i Myntri i kular ba in sa shimkhia ban pynbeit ha ka Service Rule.
Ka kynhun ka la ioh ruh ban pynsngew haba iadei bad ki jingthung kham bun ki Drug Inspector hynrei ia kane ka mat ruh yn sa advertisement noh shen.
