Hynne ka sngi ka 23 Risaw, ha ka jingialang jong ki kynhun Myntri (Cabinet Ministers) ka la mynjur ruh sa kawei pat ka mat, kata ban pynjlan iaka rta jong ki Nonghikai SSA sha ka 45 snem, ia kane la iathuh da u Myntri ka tnad pule puthi ka Sorkar Jylla, u Rakkam A Sangma.
Haba kren sha ki lad pathai khubor, u Myntri u la iathuh ba kane ka jingpynjlan ia ka rta ki Nonghikai SSA sha ka 45 snem kadei na ka bynta kito ki nonghikai SSA kiba dang don ha ka kam hikai bad kiba kwah thepkam Nonghikai biang ha ki skul bapher bapher.
U la ong ruh ba kane ka jingpynjlan ia ka rta kan ailad ruh ia ki Nonghikai SSA ban iakhun ia ki eksam thungkam bala pynbna da ka Sorkar ha ki skul Lower Primary, Upper Primary, Secondary bad Higher Secondary.