U Bah Gilbert Laloo, Nongialam barim jong ka Trinamool Congress (TMC) ryngkat ki nongkyrshan na Mylliem ha ka 19 tarik Nohprah ki la leit ban pyniasoh ialade sha ka Seng United Democratic Party (UDP).
La pdiang sngewbha ia u Bah Gilbert Laloo da u Bah Titos W. Chyne ba dei u President UDP ka East Khasi Hills District.
Haba kren sha ki Lad pathai khubor na ka liang u Bah Gilbert Laloo u la ong, “Kumba iohi ha ka jylla la pyrshang ban pynlut por naduh Garo Hills, Jaintia Hills, West khasi Hills ngi iohi ba ka TMC kam pat suh thied ha ka jylla bad ki briew jong ngi kim pat lah ban pdiang ki party nabar kim pat lah ban suh thied ha ka jylla”.
Shuh shuh u la ong “Ka jingpynlong ia nga ban rung sha ka UDP ka dei hadien ka jingiakynduh jong nga bad ki Nongialam UDP ki la pynsngewthuh kum ka jaitbynriew ngi donkam ban pynkhlaiñ ia ka Party Riewlum, ki don bun ki jaitbynriew jong ngi kiba rkhem ka mynsiem kiba stad kiba shemphang ki lah ban long ki Nongialam ha ka jylla ha kawei ka sngi lada ia rung lang sha ka Party UDP.
Kum ban shu ong ka dei kawei na ka party kaba bun kaba don ha ka Sorkar ha ka District Council, lada ki Nongialam kiba shemphang kiba kloi ban shakri ia ki paidbah bad ia ka jylla kin ia don bynta ha kum kane ka seng kam shem jingeh ban pyniaid ha ki por ban wan, ki briew kiba khlaiñ jingmut jingpyrkhat kiba don ha ka seng riewlum khamtam ha ka UDP kaba don ha ka sorkar, ngi khmih lynti da ka jingwan ngin ioh jingjop ha bun ki liang bad ha kawei ka sngi ngin ioh ban synshar ha ka District Council bad kumjuh ha ka jylla”.