Ka Krishi Vigyan Kendra (KVK) West Jaiñtia Hills, ha kane ka 30 tarik u Jymmang kaba dei ka sngi ba ar jong ka prokram ‘Viksit Krishi Sankalp Abhiyan’ wat hapdeng u slap ba jur kila leit ban ai jinghikai pynsngewthuh ïa ki nongrep ka District kynthup ïa ki 9 tylli ki shnong kata ka shnong Namdong, Moobakhon, Ksehrynchang, Sohphoh, Larnai, Tyrchang, Pdengshakhap, Jaralood bad Mawlong, kiba hap hapoh ki ar tylli ki Block jong ka Thadlaskeiñ bad Amlarem baroh ki nongrep kiba la wan ïashim bynta ki don haduh 657 ngut.
Na ka liang ki dkhot kiba leit ban ai jinghikai sha ki nongrep la pynbynta ha ki lai kynhun ka Team-1, Team-2 bad ka Team-3 ha ryngkat ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ai jinghikai ïa ki nongrep naduh ka rukom rep ïa ki jait soh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de.
La hikai ruh ïa ki nongrep kumno ban pyndonkam ïa ki bor jong ka juk stad mynta (teknoloji) ha ka kam rep kam riang, ka rukom pynïoh ïa ki symbai bad la ai jingtip ïa ki nongrep halor ki skim jong ka sorkar pdeng kum ka PM-Kisan, NMEO, KSY, Farm Mechanization, PMFBY,PP Mulching IPM, Soil Health Card Scheme, Vegetable Development scheme, Fruit Development Scheme, Plant Protection Scheme, Tuber Development Scheme, Spice development, CM-Assure, Lakadong Mission, Floriculture Mission, MIDH, State Rice Mission, NFSM, Ginger Development Scheme, Organic Manure Development Scheme, MOVCD NER bad ka Mission Lakadong.
Na ka liang ki Waheh Shnong jong kitei ki shnong kila pynpaw ka jingsngewnguh ïa kane ka prokram ‘Viksit Krishi Sankalp Abhiyan’ (VKSA) kaba donkam bha mynta ïa ki nongrep ba kin nang pynbha shuh shuh ïa ka rukom rep katkum ka jinglong jingman jong ka jaka rep.
