Ka Khasi Student’s Union (KSU) South West Khasi Hills District hynne ka sngi ka 12 Nailar 2025 ki la leit ban iakynduh ia u CEM ka KHADC, Bah Shemborlang Rynjah ban iakren halor ka jingthmu ai sop sop u Syiem Maharam ia ka jaka sha ki Shipai khlem ka jingtip jong ki paidbah lane ka Shnong.
Haba ioh ban iakren bad u Bah Markoni Thongni, President KSU Ranikor Circle, u la ong ba ka Hima Maharam kala thmu ban ai ia katei ka jaka kaba don hajan ka Wah Photmula hynrei kaba sngewsih ka long ba wat ki nongialam shnong ki khlem ioh jingtip hynrei la shu ioh ia ki khubor na kiwei. Ka seng ka la buh ia ka jingkyrpad ha u CEM ban shimkhia halor kane namar katei ka jaka ka hap hapoh u pud u sam jong ka KHADC.
U Bah Thongni u la ong ba hadien ba la ioh ia ka khubor, ki nongialam ka Seng ki la leit ban iakynduh mar mar ia u Syiem, hynrei lada jia ba leh kyllut u Syiem, ka seng kan iaid da kawei pat ka lynti.
U Bah Markoni u la pynshai ba ka seng kam pyrshah ban ai jaka, hynrei ka jingpyrshah ka long ba ki thmu ban ai ia ka jaka ia kaba la dep ban pyndonkam kum ka jaka rep jong ki paidbah nongshong shnong. “Ka jaka ba khlem pat pyndonkam ki bun, wat ktah ia ka jaka rep u Paidbah” ong u Bah Thongni.
Ha kaba iadei bad kane, u CEM u la kular ban shimkhia bad lada jia ba poi ki kot ki sla ban pan jingmynjur na ka Hima, u CEM un pynsangeh shwa.
