Ka Seng Jaintia Student Union Central Body (JSU-CB) hynne ka sngi ka 2 tarik Ïaiong ka la wan iakynduh ia u Ma Sniawbhalang Dhar, Deputy Chief Minister ka sorkar Jylla ban kyrpad ban buh noh kawei ka jaka thoh Exam jong ka MPSC ha nongbah Jowai.
Haba kren sha ki lad pathai khubor na ka liang u General Secretary ka JSU u Neilkee Mukhim la ong ka jingwan kynduh ia u ma Sniawbhalang Dhar, Deputy Chief Minister ka dei halor ka jingbym don ka jaka thoh exam ha MPSC Jowai bad naduh u Snem 2013-2014 ka Jowai ka la ioh ia ka MPSC Cell, hynrei ka dei tang ka Department. U la ong ki paidbah na Jaintia ki hap ban wan thoh exam shaduh sha Shillong ka lynti kaba jngai naduh thaiñ khappud (Border area) ki iakynduh shibun ki jingeh khamtam ban wan sha Shillong ki bun bym poi biang por shuh namar ba jur palat ka dhengkali.
Na ka liang ka Seng Jaintia Student Union ka ai khublei ia u ma Sniawbhalang Dhar ba u la kular ban shimkhia ia kane ka mat haba iadei bad ka jingdonkam ban buh ia ka Exam Centre ha Jowai kaba dei ka sienjam kaba kongsan ia ka Jaintia Hills baroh kawei.
Shuh shuh u samla Neilkee u la ong lada ka Sorkar kam shimkhia haba iadei bad ka jingdonkam ban buh jaka thoh exam MPSC ha Jowai kumba ki la buh ha Tura bad Shillong ka Jaintia Student Union kan sa shim da kiwei ki sienjam haba iadei bad kane ka issue.
