U ma Marshal Biam uwei na ki nongtrei mon sngewbha na ka bynta ka bha ka miat jong ka imlang ka sahlang, u leit ban ujor sha u EE PWD Road NEC Division Khliehriat, halor ka jingsniew jong ki surok R.B.B ha ki thaiñ jong ka shnong Lakadong haduh ka shnong Borkhat Natbor, Pdieng Wahkhriem, Demlaang, Shnong jong ka East Jaiñtia Hills.
U ma Biam u la kdew ba ha kine ki khyndiat bnai ba la dep ki briew jong ka thaiñ ki ïakynduh ïa ka jingjur slap kaba jur bha khlem sangeh bad ba slem bad ha kaba ki surok ki la kylla long thliew lut, kaba la ktah ia ka leit ka wan na ka bynta ki paidbah bad kane ka la wanrah ïa ka jingeh kaba khraw ïa ki nongshong shnong ban leit jingleit na kawei ka shnong sha kawei pat ka shnong khamtam ha ki por ba pang bad donkam ïa ki jingsumar ba kyrkieh.
U la ong ba ki nongshong shnong katei ka thaiñ na ka por sha ka por ki la leit ban mih sha ki bor ba dei peit ia katei na ka bynta ban phah maramot ia katei ka surok, hynrei ym shym la don kano kano ka sienjam haduh mynta, wat la ladep ban phah bun sien bun sien da ki jingthoh sha ki tnad ba dei peit ban pynbha noh mardor hynrei ki bor ba dei peit kim treh satia ban peit ia ka long ka man jong utei u surok.
Kumta, ki nongshong shnong ki la kyntu ia ka tnad sorkar ba dei peit ban shim khia mardor ban maramot ia katei ka surok khlem da pynslem bad lada ka sorkar kam lah ban shim ia kum kine ki sienjam bad ban leh kyrkieh katba lah ia kane ka kam namar ba ka la ktah jur ia ka jingim jong ki nongshong shnong ka thaiñ.
