Mynta ka sngi u ma O.R Shallam, na Jowai u wei na ki riew rangbah nongshong shnong ka ri Lum Jaintia uba don ruh ka jingkitkhlieh ia ka imlang ka sahlang ula pynher da ka shithi sha u Myntri ka sorkar Pdeng ba dei peit ia ka Road Transport and Highways u Nittin Gadkari halor ka jingieh jyndat jong ka jylla ia ka long ka man jong u surok bah NH-6 uba la jutip mynshwa kum u NH-44.
U ma Shallam um banse ban phah ia kane ka shithi kaba long ha kajuh ka por kum ka jingujor sha utei u Myntri ka sorkar Pdeng halor ka jingbymlah jong ka sorkar Meghalaya ban pynbha ia u surok NH-6 uba pyniasoh naduh Shillong bad iaid lyngba ka ri Lum Jaiñtia bad poi shaduh sha Silchar jong ka jylla Assam.
Ha kane ka shithi u ma Shallam ula kdew ia ka jinglong jingman jong u surok kumba 80% u la dap sa tang da ki thliew ki syar bad ha ka por slap lei bun ki bynta jong u surok bah kila kylla pung um. Kane ka jingsniew shaba palat jong u surok bah kala wanrah bunsien ia ka jingduh noh jong ki kali bad kane ka la long ka daw jong ka jingsahkut ki kali bad kaba la ktah da ki bun bun kynta ia ki nongleit nongwan lyngba une u surok bah.
U ma Shallam ula kynthoh jur ba ki nongialam jong ka jylla khamtam ia u Myntri Rangbah ka jylla u Conrad K. Sangma ba um ioh por shuh ban peit ia kane ka jingeh jong ki nongshnong shnong ka jylla, namar ba u la bun kam palat tang ha kaba pynlong jingialang ia ka Party jong u sha kiwei pat ki jylla hapoh ka ri bad klet noh ia ki jingeh ba ki nongshong shnong ki iakynduh.
Kumta u ma Shallam ula buh ka jingkyntu jur ia u Nitin Gadkari ba un shim khia dalade ban bthah ia ka sorkar jylla bad ki bor ba dei peit ban pynbha noh kloi ia une u surok bah NH-6 khamtam kiba don ha ki bynta jong ka ri Lum Jaintia.
