Ka Hynniewtrep Youth Council (HYC) War Jaintia Circle hynne ka sngi ka 7 tarik Nailar 2025 ka la wan iakynduh ia u Myntri ka tnad Bording ban pynsngew ha u ia 10 tylli ki mat kiba ktah ha kaba iadei bad ka bording.
Haba kren sha ki lad pathai khubor u President ka HYC War Jaintia Circle u Youdahunki Shylla u la pyntip ka jingpynlip bording khah khah ha ki thaiñ War Jaintia, bad ha ki thaiñ Amlarem ka dei ka jingpynslem ban shna ia ki control room bad ia kane ka control room la shna da kawei ka kompany na Kolkata naduh ki snem 2016 bad haduh mynta ruh kam pat shym la pyndep bad ka seng ka kyntu ia u Myntri ka tnad bording ban shimkhia ban phah pyndep noh ia kine ki control room ban lait ka jingpynlip bording khah khah.
Ka Seng ka dawa ruh na u Myntri ka tnad bording ban pynthymmai noh ia ki Post lait kiba la sarang bad ban buh noh da kiba thymmai, namar ki paidbah ki hap ker da ki dewbilat ia kine ki post sarang bad ki post kiba la rim ban lait na ka jingkhyllem.
Ka seng ka dawa ruh na u Myntri ban ker ia ki tranformer ha man la ki shnong ban lait na kano kano ka jingjia bad ka seng ka kyntu ia u Myntri ka tnad bording ban buh bad ker noh da ki kynjar nar ban lait na kino kino ki jingmynsaw, bad u Myntri u la pyntip ba un sa buh da ki kynja plastic ban ker ia ki waiar light ban lait na ka jingmynsaw ki paidbah.
Nalor kata ka Seng ruh ka la kylli haba iadei bad ka phase II jong ka Hydro Lehska Project lano kan sdang bad na ka liang u Myntri u la pyntip ba ka tnad bording ka dang ap ia ka Clearance na ka tnad khlaw bad u la pyntip ban iai shah haba iadei bad kane ka Hydro Lehska Project.
Na ka liang ka Seng ka la ioh ruh ban pynsngew ha u Myntri ka tnad bording ban weng noh ia ki machine kiba la rim bad slem bha ki ba don ha ki sub-station ha ki thiañ War Jaintia bad ban buh noh da kiba thymmai khnang ba ka jinglip bording kan ym jia shuh nangne shakhmat.
Ka mat kaba kongsan eh ka dei halor ka ioh kam ioh jam, ka Seng ka la pynsngew ba dei ban ai kam ai jam ia ki khun samla kane ka thaiñ War Jaintia bad shibun kiba la nang la stad bad kiba lah ban trei ia ki tnad bapher bapher ha ka tnad bording bad na ka liang u Myntri u la kubur ba sngewthuh ba lada don da ki trai shnong ka suk lada don kano ka kam kyrkieh haba iadei bad ka bording ban ia kaba jied da kiba na jngai shnong.
Ka seng ka la kyntu ia u Myntri ban ai kam ia ki kontraktor traishong ynda la sdang ka phase II kiba la lah ban shna katkum ka jingibit jong ka MeECL,
Khatduh ka seng ka la kyntu ia u Myntri ka tnad bording ban shimkhia ban pynsted ha kaba iadei bad ka jingsiew ia ki bai jaka haba iadei bad ka jingwan ka project phase II ka Hydro Lehska Project bad ka seng kam kwah ban jia kum kiwei ki shnong ka project kala sdang bad ka jingsiew ia ka bailutsan ka slem.
Khatduh ka seng ka la pynsngew ha u Myntri ha ka por ba sdang ia kane ka Phase I Project Hydro ki bun ki sukok haduh mynta ruh ym pat pyndep.
Na ka liang u Myntri u la iohi haba iadei bad jingpyntrei ia ka phase I jong ka hydro project bad u la pynpaw ba lada dei ban pynsngew sha u myntri ka tnad PWD un sa shimkhia khnang ba ki paidbah kin lait ban iakynduh jingeh haba iadei bad ka surok halor ka jingpyntrei ia ka phase I jong ka Hydro Lehska Project.
Na ka liang u Myntri u la pyntip ba un sa shimkhia ia kine ki mat baroh kiba ka HYC War Jaintia ka la pynsngew haba iadei bad ka bording bad ka Seng ka pynpaw ia ka jingsngewnguh ia ka U Myntri ba u la kular ban shimkhia ia ki jingeh jong ki paidbah jong ka War Jaintia.
