Ka Khasi Student Union Sengkmie mynta ka sngi ka 6 tarik Risaw 2025 ka la wan iakynduh ia u Myntri ka tnad ka koit ka khiah u Bah Wailadmiki Shylla halor ka bhah pule MBBS.
Haba kren sha ki lad pathai khubor na ka liang u President Rangbah jong ka Seng u Samla Lambokstar well Marngar u la ong na ka liang ka seng ka la ioh ban pynsngew ha u Myntri ba dei ban weng noh ia ka kyndon kaba don ha ka SOP ha ka Clause 9.6 haba iadei bad ka jingmih kyrteng na ka bynta ka bhah pule doctor ba kyrshan da ka sorkar jylla.
Nalor kata u ka Seng ka la ioh ruh ban pynsngew kumno ban heh marks da kiba don ha ka waiting list ban ia kiba don ha ka open category, bad kiba heh marks kiba dei hok ban ioh ki dei ban ioh ha kane ka bhah pule doctor MBBS.
Na ka liang u General Secretary ka Seng KSU Samla Donald V Thabah u la ong ki don ki kyndon kiba biang ha ka SOP bad ka SOP kaba don ha ka 9.6 ka dei kaba shyrkhei kaba ïuhroit ia ka jaitbynriew, bad na ka liang u Myntri u la kular ban shimkhia bad ban pynbeit noh da ka list kaba thymmai bad kin sa pynbeit noh ia ki SOP.
U Samla Donal V Thabah u la pyntip ruh ba ka Seng ka la ioh ruh ban pynsngew halor ka kynrum kynram ha NEIGRIHMS bad na ka liang u Myntri ka tnad ka koit ka khiah u la kular ban shimkhia ban pynbeit bad ki bor pyniaid jong ka NEIGRIHMS haba iadei bad katei ka kynrum kynram.
Khatduh u Samla Donald V Thabah u la ong ruh ba ka Seng ka la ioh ban pynsngew halor ka NEIAH (North East Institute of Ayurveda & Homeopathy ha kaba ha ka Graduate ki don la ka jong ka bhah na ka bynta ki samla pule ka jylla hynrei haba phai sha ka Post Graduate kim don bad na ka liang ka tnad ka koit ka khiah kan sa shimkhia ban pynbeit halor kine ki jingeh ba baroh ar tylli kitei ki jaka pule Doctor.
