Ki dkhot jong ka Hynñiewtrep Achik National Movement (HANM) Ribhoi Circle ki la wan iakynduh mynta ka sngi ka 27 tarik Nailur ïa u myntri ka tnad bording U AT Mondal halor ka jingdonkam kyrkieh ban buh noh ia ka Sub Station 132 kv ha Nongpoh Ri bhoi.
Haba ai jingkren sha ki lad pathai khubor mynta ka sngi na ka liang u President ka HANM Ri bhoi u bah Don Roy Ksiar u la pynpaw ba ka jingiakynduh ia u myntri ka tnad bording ka long halor ka jingdonkam kyrkieh ban buh noh ia ka Sub Station ba 132kv ha Nongpoh namar ka shnong Nongpoh ka dei ka District Headquarter jong ka Ri Bhoi kaba la ioh naduh u snem 1992 bad kat haduh kine ki sngi kam shym la don ia ka Sub Station 132 kv kat kum ka jingdawa ka por.
Ka Nongpoh ka dei kawei na ki District ba don lut ia baroh ophis treikam kum ka Civil Hospital ki Skul ki College ki Ophis sorkar bad kiwei kiwei. U pynpaw ba kumba arphew san hajar tylli ki longïing bad 400 tylli ki shnong ha Ri Bhoi ki ba pyndonkam ia ka bording, lada ioh noh ia ka Substation ba 132 kv kan long ka jingkyrkhu ba khraw ia ka Ri Bhoi baroh kawei.
U la pyntip ruh ba na ka liang u Myntri u pynpaw ba un ïa trei lang ryngkat bad ka seng bad un sa rah sha ka Cabinet namar kane kam dei ka Project ba rit ka dei kaba heh bad yn sa shim rai da ka Cabinet ban pynioh ia kane ka jingdawa ka HANM.
