Ki nongialam ka NPP Farmer Front hynne la sngi ki la leit ban iakynduh ia u Symbud Myntri Rangbah u Bah Prestone Tynsong haba iadei bad ka jingkynduh jingeh jong ki nongrep synsar, ki nongrep kwai bad ki wei kiwei, ka jingbym don doctor bad bym don dawai ha ki jaka ri jingri.
Haba kren sha ki lad pathai u Bah HM Shangpliang u la ong ki nongialam ka NPP Farmer Front na ki district bapher bapher haba ki leit sha ki jaka ri jingri ki shem ba bun na ki jaka ri jingri kim don ia ki doctor bad kumjuh ia ki dawai.
U la bynrap da kaba ong ba hap ban wad bniah kaei kaba pynlong ia kane ka tnad ban dkoh treikam bad u kyntu ia ka sorkar ba kan peit bniah haba iadei bad kane ka tnad ri jingri.
Shuh shuh u la ong ba na ka liang ka NPP Famers Front kan sa iakynduh biang na ka bynta ban buddien haba iadie bad kane ka mat. U la kyntu ia ki nongrep ba lada ki don kano kano ka jingeh ki dei ban pynsngew sha ki nongialam jong ka NPP Farmer Front kaba ngi la buh bad thung ha ki district bad ki Block na ka bynta ka jingduna ka ioh ka kot jong ki Nongrep.
U Symbud Myntri Rangbah u la ong ba un sa shong jingialang bad ki tnad ba kynthup ia ka Agriculture, Horticulture, Vertinary na ka bynta ban buddien ia kane ka kam.
Ka NPP Farmer Front ka la ioh ruh ban pynsngew haba iadei bad ki jingduna ki symbai jhur ba ki don ki nongrep ba ki ioh ia u symbai ki don kiba leit phai thylli bad ki la ioh ban pynsngew ha u Symbud Myntri Rangbah ia kane ka bynta.