Ki Synjuk Waheh shnong ka ri Jaintia ha ryngkat ka dorbar shnong Lapangap bad ki kynhun sengbhalang bapher bapher na Jaiñtia ba kynthup ia ka WJHDU KSU, FKJGP, JSU, JSM bad HNYF hynne ka sngi ka 27 tarik Jylliew ki la wan iakynduh ia u Symbud Myntri Rangbah jylla u Bah Prestone Tynsong uba dei ruh u Myntri ka tnad kam pohïing ka jylla ban pysngew sha u haba iadei bad ka jingjia ba dang shen ha ka shnong Lapangap.
Haba kren sha ki lad pathai khubor u President ki Synjuk waheh shnong ka Ri Jaintia u Arminius C Lipon u la ong nyngkong ngi ai khublei ia ka sorkar ki tnad Pulit bad kumjuh ia u Home Minister bad kumjuh ia u Myntri Rangbah ka jylla ha ka jingjia kaba la jia ha ka 25 tarik ha kaba ki briew na ka jaitbynriew Karbi ki la wan leh bor bad thombor da kaba thung dieng, ha kaba ki nongshong shnong ryngkat bad ki paidbah ka shnong Lapangap ki la wan peit bad lap ba ka don ka jinglehbor bad thombor ia ki jaka kiba dei hok jong ka shiliang myntang bad ka dorbar shnong Lapangap.
Shuh shuh u la ong ka la don ruh ka jingshah thombor ha kaba ki pulit Assam ki la siat tear gas ia ki paidbah nongshong shnong ka Lapangap. U la ong ka sorkar ka la phah ia ki bor district ban iakren pynbeit pud hapdeng ki DC jong ka West Jaintia Hills bad ki DC jong ka West Karbi ha kaba kim shim burom ki pynkheiñ bad ki don ki por ba ki shait wan ban pyndik namar mynta ka dei ka por thung por bet ha kaba ki nongrep ha katei ki shnong kim nud shuh naduh ba jia katei ka jingjia.
Na ka liang ki Synjuk Waheh shnong bad ka dorbar shnong Lapangap ki la kyrpad ia u Symbud Myntri Rangbah ban buh da ka kynja camp na ka bynta ka jingshngaiñ jong ki nongshong shnong ha katei ka thaiñ Lapangap bad kumjuh ia ki nongrep ba kin ioh ka jingiada na ka jingthombor ha ki briew Karbi bad ki Pulit Assam.
Na ka liang u Waheh Shnong ka Lapangap u bah Deimonmi Lyngdoh u la ong ka Lapangap ka dei ka jaka jong ki nongshong shnong ka Lapangap bad ka sorkar ruh ka pyntip ba katei ka jaka ka dei jong ki nongshong shnong ka Lapangap. U la ong ba kum ki nongshong shnong jong ka Lapangap ki don ki kot ki pata kiba la dep register ha ka West Jaintia District bad kum ki nongshong shnong ka Lapangap ki kyrpad ia ka sorkar ba kan shimkhia ban iada ia ki paidbah jong katei ka shnong.
U la bynrap naduh ba jia ha ka 25 tarik jylliew ki bor pyniaid jong ka West Karbi bad ki Pulit ka Assam ha ryngkat ki la syrtap bad ki buh jingma ha ryngkat ka jingbyrngem bad ka long kaba eh ia ngi kum ki nongshong shnong namar mynta ka dei ka por thung bad kum ki nongrep ngi kwah ban leh ei ei ia ki jaka kiba rep ha katei ka shnong Lapangap.
