Saw ngut na ki hynriew ngut kiba la ioh phet jubor na Along Jowai jong ka District Jail kila khlad noh ha ka jingshah bom ha ki paidbhur hapoh jong ka wei ka khlaw kaba don ha ki thaiñ Shangpung, West Jaintia Hills District mynta ka sngi.
Katkum ka tyllong khubor Pulit la iathuh ba hadien kitei ki hynriew ngut kila ioh ban phet jubor na katei ka Jail kila poi shong rieh ialade hapoh kawei ka khlaw kaba don ha ki thaiñ Shangpung. Dei hangne la don ba iohi ia ki, kumta ki paidbah kila ialum ban beh kdong ia ki. Ha kane ka jingjia ki paidbah kila bom bad tied ia kitei ki saw ngut haduh ba kin da mynsaw jur bad hadien katto katne por kila khlad noh la ong ka khubor.
Ia ka kyrteng jong kine kiba la khlad ym pat lah ban pynthikna namar ki Pulit jong ka West Jaintia ki dang pynlong ka jingjurip halor kane.
Ki tyllong khubor ba thikna ki iathuh bad la suba ba uwei na kine kiba la khlad u dei u I Love You Talang.
Kum ban shu pynkynmaw ba kitei ki 6 ngut ki runar kiba ioh lait phet na Jail ha ka sngi Saitjain 10.09.2022, ar ngut na kitei ki dei u I Love You Talang uba na ka shnong Moorap West Jaintia Hills bad u Ramesh Dkhar na ka shnong Tongseng, East Jaintia Hills District, kiba dang shu shah kem ha ki pulit ha ka jingdonkti jong ki ban pyniap ia ki ar ngut ki nongniah kali kamai dang ha une u bnai Nailar ba la dep.
Katba saw ngut kiwei pat kiba la ioh ban phet lang ki dei u Marsanki Tariang uba la shah rai pynrem ha ka ïing bishar uba na ka shnong Priang, u Rikmenlang Lamare na Barato, u Shidorki Dkhar na Thangrain bad u Lodestar Tang na Mootyrshiah.
