Ka samla Darilin Tang kawei napdeng ki samla napoh ka Ri ban leit mihkhmat sha ka Exchange programme bala tip kum ka Japan- East Asia Network of Exchange for Student and Youth (JENESYS) 2023 bala pynlong da ka Japan International Cooperation Centre (JICE) ka ba la sdang naduh ka 12 tarik u Nohprah haduh 19 tarik u Nohprah 2023.
Kane ka “JENESYS” ka long shi bynta ban ïa phylliew jingmut hapdeng ki samla ïa kaba ka sdang naduh ka snem 2015 hapdeng ka Ri Japan bad ka thaiñ Asia-Pacific region.
Ki samla ki ban leit ïashim bynta ha kane ka prokram kin long na ki hynriew tylli ki ri kata ka India, Sri Lanka, Maldives, Nepal, Bangladesh bad ka Pakistan. Ha une u snem yn pynlong ïa ka ha nongbah Tokyo bad ha kiwei de ki shnong hapoh ka Ri Japan.
Halor kane na ka liang ka tnad Department of Youth Affairs, Government of India kaba la jied ïa ka kyrteng jong kawei na ki Research Scholar na ka tnad Department of Management, NEHU, Tura Campus, ka samla Darilin Tang kaba dei ruh naka shnong Iooksi, West Jaiñtia Hills kum kawei na ki delegates ha kane ka exchange programme bad ki don baroh 8 ngut ban long kum ki delegates napoh ka Ri. La ïathuh ruh ba ka samla Darilin Tang ka dei tang ma ka napoh ka thaiñ North East ban ïoh leit sha katei ka prokram.
Ka jingmut jong kane ka exchange programme ka long shi bynta ban pynkiew shuh shuh ïa ka jingsngew shañiah para briew hapdeng ka Ri Japan bad ka thaiñ Asia-Pacific region bad ba kan don ka jingïadei paralok bad ka jingïatreilang.
Ha ka juh ka por kane ka prokram kan ïarap ban tip khambniah shaphang ka Ri Japan naduh ka ïoh ka kot, ka imlang ka sahlang, ka jingriew spah ha ka jinglong tynrai, ka saiñ hima sima, ban pynbha ïa ka jingïadei ha kum kine ki por nalor kiwei de.