Ka United Democratic Party (UDP) mynta ka sngi ka 8 tarik Nailar ka la shong jingialang ban jied ia u General Secretary ba thymmai hadien ka jingiehnoh kam u General Secretary u Dr Jemino Mawthoh.
Ha kane ka sngi ka Central Executive Committee ka la jied ia u MDC ka Sohra u Bah Titos W Chyne kum u General Secretary ba thymmai bad uba dei ruh u Nongialam ka Liang Pyrshah hapoh KHADC.
Na ka liang u Bah Titos W Chyne u la ai khublei ia ka Central Executive Committee kaba la ibit ban bynshet ha u ia kane ka kam General Secretary ba thymmai jong ka Party.
U la ong ba un shimti ia ka kam kum u General Secretary ba thymmai ha kaba ka don ka jingdkoh ha kine ki khyndiat bnai ba la dep, hadien ka jingiehnoh kam u General Secretary barim u Dr Jemino Mawthoh, bad u la pynpaw “Nangne shakhmat ngin pyntyllun ia ka kam bad ngin pynkhlaiñ shuh shuh ia ka Party bad kan don ka jingjan shuh shuh bad ki nongmihkhmat bad ka Party”.
