Ka khubor Pulit kaba la phah la iathuh ba ha ka jingbud dien ia ka jingioh kurup bad kem ia uwei u briew ba la tip kyrteng kum u Salnang M Sangma hynnin ka sngi na Sawlad Madanrting da ka kynhun ANTF, mynta ka sngi kila ioh ban kurup biang ia ki dawai pynbuaid kiba la tip kum ki amphetamine (yaba) kiba don haduh 4000 tylli na ka hotel City Palace kaba ha Lapalang, Shillong.
Ki Pulit ka ANTF ha ka jingbud dien ia ka jingphla jong u Salnang M Sangma uba la shah kem hynnin ka sngi, ula pynpaw ba u trai jong ki 6000 tylli ki tablet amphetamine ki dei jong uwei na ki trai jong ka hotel kaba don ha Lapalang, mynta ka sngi pat kila leit ban khynra ia katei ka Hotel City Palace. Ha kane ka jingkhynra kila ioh ban kurup sa 4000 tylli ki tablet yaba kaba la kot haduh 10 hajar tylli lada kheiñlang bad kiba la ioh ban kurup hynnin ka sngi.
Ha kaba iadei bad kane ki Pulit kila kem ia u kynum jong u tei u trai ka City Palace Hotel u Labius Aregh bad ka jingtohkit ka dang iaid shakhmat, ong shuh shuh ka khubor Pulit.
