Ki nongialam bad ki dkhot ka Hynniewtrep Youth Council (HYC) mynta ka sngi ka 14 tarik Risaw ki la leit ban synran ia u samla Isaac Basaiawmoit, General Secretary ka Seng uba la shah khot hajir ha Rynjah Police Station.
Kane ka jingshah khot hajir u nongialam ka seng ka long hadien ba na ka liang ka seng ka la leit ban khynra droks ha ki thaiñ Lapalang, Rynjah, Pohkseh bad ki jaka ba hap hapoh ka jingpeit jong kane ka thanad bad ia u samla Isaac Basaiawmoit la pynngat haduh 4 tylli ki kyndon aiñ.
Na ka liang ki nongialam ka seng, ki la pynpaw ia ka jingbitar namar ka jingkynnoh ki pulit da kaba ai ehjahar ia ki nongialam ka seng da kaba kynnoh ba ki shim ia ka aiñ ha ka kti. Ki la ong ba watla don ki Pulit kiba ai ka jingkyrshan ia ka seng, hynrei kan sa poi ka por ba ka seng kan sa thad madan ia ki kam jyrsieh kiba ki pulit ki leh da kaba die tuh ia ki droks ba la ioh kem bad ka seng ka la mana ia u SI jong ka Rynjah Police Station ba um dei ban thok ban shukor ia ka kam ba ka seng ka leh.
Kum ban shu pynkynmaw ha ka 1 tarik Nailur 2024, ka seng ka la ioh kem ia 3 ngut ki nongkhaii droks na Society Colony ha Rynjah bad ha ka por ba mut thang noh ia u droks, ki pulit ki la poi ban pynpulom noh ia kane ka jingthmu jong ka seng.