-Shah tap bun ki bynta jong ka shnong Kharkhana ha ka umsaw, shong syier ki paidbah-
Ka shnong Kharkhana ka dei ka shnong kaba don ha khappud Bangladesh kaba jngai 41 km na Amlarem Block bad 65 km na nongbah Jowai, ka dei ka shnong kaba shah ktah bha na ka jingwan kane ka eriong Remal kaba la wanrah u slap uba jur bha sha kine ki thaiñ naduh ka 28 tarik haduh 30 tarik u Jymmang, 2024.
Ka shnong Kharkhana ka don harud jong ka Wah Myntdu (kaba tip kum ka Wah Tisang) bad la kerkut ïa ka da ki shnat wah kiba rit bad ka long kum ka dewlynnong ha ki por lyiur khamtam haba jur ka jinghap slap.
“Ki nongshong shnong kim ïoh thiah ïoh dem shuh tang shu poi ka por slap sha katei ka thaiñ” namar ki hap ban peit bad sumar ïa ki lieng kynda jong ki, ïoh ba ki shah rong ha ka umsaw. Ki tieng ruh lada ther u lapbah uba jur naduh na thaiñ Jowai ter ter kan wanrah ka jingshlei um bad ka um ka ju poi sha duh ki ïing briew, ïingmane, ïingskul, jaka rep bad shaduh ki jaka ri jingri, ka long ka jingduh nong kaba khraw ïa ki lada ki shah rong ne shah tep ha ka umsaw.
Ka shnong ka don 3 tylli ki wah rit kiba pynthut bha ïa ka leit ka wan sha katei ka shnong lyngba u surok, tang shu ther u lapbah kine ki wah ki shlei bad ka um ka ïaid nalor u surok, bunsien haba jia kum kane ka khep ki nongshong shnong ki hap shong ïing, ym long shuh ban leit ban wan, leit Hospital ne leit don kam bad ruh bun sien ki mar rep ki pyut namar ba la sahkut ym long shuh ïa ki Kali ban ïaid ba la shlei um bad kaba donkam kyrkieh ïa ki mynta ka long ban don noh da ki jingkieng ba pura.
Ka shnong ka don kawei ka ophis ka sorkar pdeng ka Central Water Commission (CWC) ha ka shnong Kharkhana, kane ka ophis ka thew bad peit ïa ka jingheh bad jingrit ka um ha ka Wah Myntdu (Tisang) katkum ka jingtip ba la ïoh na ka ophis la ong ba u lapbah ula ther ha ka shnong Kharkhana ha ka 29.05.2024 ula poi haduh 352.2 mm.
Na ka jingther u lapbah bajur na ka por sha ka por ka shnong ka kynduh shibun ki jingeh, kumta bunsien ka shnong ka ju leit ai jingthoh ban kyrpad sha ki bor sorkar ban ai da ki jingkieng ha kine ki wah rit bad kumjuh sha u local MLA ruh bad haduh mynta ym pat don dak eiei ha kaba ïadei bad kane ka bynta.
Ka shnong Kharkhana ka kyrpad ïa ki bor ba dei khmih bad kin sngewbha ban peit lem ïa ka jingeh jong ki bad ban leh eiei na ka bynta jong ki khnang ban suk ha ka leit ka wan namar u surok na Muktapur Kharkhana u ïasoh bad ki shnong ba don sha East Jaiñtia Hills kum ka Rymbai, Lad Rymbai bad Khliehriat.
