Kawei ka longïing naka shnong Sohmynting West Jaiñtia Hills kaba don ïa ka hali rep kba hajan ka dam um, ïa kaba la den khnang ban pynpoi ïa ka umbam shaduh sor Jowai lyngba ka projek ‘Jowai Greater Water Supply Scheme’ ïa kaba la tei lyngba ka tnad PHE.
Na ka liang katei ka longkmie kaba dei trai ïa ka hali kba ka kong Phrai Pyrtuh haka jingkren bad u nongthoh khubor kala pynsngew ïa ka jingeh kaba kila mad kum ka ïing ka seng naduh bala dep ban den ïa katei ka dam um.
Kala ong ha ki por mynshwa kam shem la wan kum kane ka jingjia khamtam ha ka por ba wan aiom slap ha kaba um kala rong bad pyntwa ïa kitei ki bynta (hali) kiba don harud jong ka wah bad kane kala wan jia manla u snem.
Kala ong ruh ha ki por mynshwa kala ïoh ban ot ïa u kba na katei ka hali kaba la kot sha ka 40 byrni hynrei mynta pat kala ïoh tang kumba 27 byrni eiei bad kane ka buh jingeh ïaka ban pyndap khaw ïa ka ïing ha baroh shinem.
La pynsngew da katei ka longkmie ba kane ka jingjia ka lah ban dei na ka daw ka jingtei torti ïa katei ka dam da ka tnad PHE, kumba ka long mynta katei ka dam um ha Umngot sha shiliang jong ka dam um ki don da ki mawsiang bad kim shem la shah ktah eiei, katba ïa ki bynta na ka liang ka diang (ba tuid ka um sha wah) kila shah rong manla u snem ha ka um saw namar kadei ruh ka khyndew met.
Kaba sngew lyngngoh shuh shuh watla katei ka dam ba shah rong bad shah pynjulor haka um, naka liang ka tnad PHE kala shu maramot da kaba pyndap tang da ki maw bad u shyiap nalor bad ha ka por ba wan ka um heh kitei ki bynta kila shah rong biang manla u snem kane kala wanrah jingma kumjuh na ka jinghiar arsut ka um bad kan ktah ruh ïaka rukom tam um bam shaduh Jowai.
Halor kane ka jingshah pynjulor jong katei ka hali rep jong ka kong Pyrtuh na ka por sha ka por kala dep ban ujor sha katei ka tnad khamtam sha u EE jong ka tnad PHE Electrical ba un ïarap ban leh ïa kaba donkam hynrei haduh mynta katba dang poi ki snem ka hali kba jong ka kong Pyrtuh kala nang shah pynjulor namar ba ka don hawah jong ka dam um.
Na ka liang ka kong kong Phrai Pyrtuh kala dep ruh ban ujor sha u MLA ma Wailadmiki Shylla ba un ïarap lem ïa kane ka jingshah pynjulor ka hali rep kaba la jan duna ïa ka 1 acre.
Ha ka juh ka por kala dep ruh ban ujor sha ki bor Shnong wat na ka liang ka shnong ruh kala dep ban leit jurip ïa kane haka 18 tarik u Nohprah, 2023 bad kila lap ruh ïa ka jingshisha kum ka Shnong kala dep ruh ban pyntip ïa kane sha u EE jong ka tnad PHE ban leh ïa kaba donkam.
