Haduh mynta ka sngi ka sorkar pdeng lyngba ka Central Committee kala kyntait ia ki lai tylli ki Tableau ne ki jingpyni nuksa ia jinglong jingman jong ki jylla kiba la thmu ban pyni ha ka jingrakhe ia ka Republic Day ha nongbah New Delhi ha kane ka 26 tarik mynta u bnai.
Kine ki lai tylli ki Tableau kiba la shah kyntait ki dei ki jong ka Delhi, ka Punjab bad jong ka Karnataka. Na ka liang jong ki liang pyrshah hapoh ka sorkar kila pynrem jur ia kane ka jingleh ka sorkar pdeng bad kila kynthoh ruh ba kane ka jingleh shiliangkhmat jong ka sorkar pdeng ba lam khmat da ka BJP ka long ban iuh roit ia ka hok jong kito ki jylla kiba ym shem la synshar da ka BJP.
Na ka liang jong u Chief Minister ka Karnataka u Siddaramaiah ula kynthoh jur da kaba ong ba ka sorkar pdeng kala pynkhlemraiñ ia ki jylla ki bym shym la synshar da ka BJP da kaba kala pynduh ia ka hok jong ki wat ban pyni ia ki Tableau kiba kila dep ban pynkhreh janai halor ka jinglong bapher bapher bad jinglong kyrpang jong ki jylla jong ki. Ula ong ba kane kala ktah jur bad pynjah burom ia ki 7 klur ki jait bynriew Kannadiga.