Ap ka JSM haduh 3 tarik u Nailar ka jingwan hiar ki ar CM
Ka Jaiñtia Students’ Movement (JSM) mynta ka sngi kala thmu ban leit pynpra syndon ïa ka Entry Tax Gate kaba don hapoh ka shnong Khanduli ïa kaba la wan ban buh da ka KAAC naduh ka 15 tarik u bnai Ïaïong mynta ka snem kaba dang ïeng haduh mynta.
Ki Dkhot ka seng ynda kila poi ha ka shnong Khanduli na ka liang ki bor District ka West Jaiñtia Hills ha ryngkat ki pulit ki la pakhang lynti noh ïa ki dkhot ka JSM haduh ba la mih ka thma ktien kaba jur hapdeng ki dkhot ka seng bad ki Magistrate.
La ïathuh da ka seng na ka por shah ka por kila dep ban dawa kynriah ïa ka Entry Tax Gate jong ka Assam, haduh ba la dep pynlong ïa ka jingïamih paidbah ha Nongbah Jowai ban kyntu ïa ki bor District bad kumjuh na ka JHADC ba kin shimkhia ïa kane.
Hadien ba ka seng kam shym la ïoh lad ban tur sha ka jaka ba don ka Tax Gate, naka liang jong ki bor District ki la pynthikna sha ki dkhot jong ka JSM ba haka 3 tarik u Nailar (August) kin sa wan ki 2 ngut ki Chief Minister jong ka Assam bad Meghalaya ha Shnong Khanduli na ka bynta ban ïakren halor ka jingïa pynbeit pud hapdeng kine ki ar jylla ha ka wat kaba ar bad kumjuh ïa kane ka Entry Tax Gate.
U samla Lening Star Rymbai u ba dei u President ka Central Body ula ong na ka daw ka jingbuh teng jong ka sorkar ban weng noh ïa katei ka Tax Gate, kala pynlong ïa ka seng ban hiar mynta ka sngi sha Khanduli, hynrei hadien ka jingïakren kila shaniah ïa ka sorkar hapoh kane ka taïew ban wan na ka bynta ban pynbeit ïa kane ka jingdawa.
U samla Ribok Biam, President ka Western Region ula ong hadien ka jingïakhih na ka liang ka seng kam banse shuh ban shim ïa kane ka sien jam ban leit pynpra ïa ka Entry Tax Gate, hynrei ka la don ka jingïakren sngewthuh jingmut mynta ka sngi ba yn pynbeit ïa ka ha ka 3 tarik u August 2023.
Ula kren shai lada kim lah ban pynbeit ïa kane ka jingdawa ki dkhot ka seng ki lah ban tur beit sha khmat wat ha ki por mynmiet ruh ban pynpra ïa katei ka Tax Gate.
