Mynta ka sngi ki pulit ka West Jaiñtia Hills District ki leit ban shimti ïa kawei ka metiap bala pyut ha kawei ka rud surok khlaw ha ki bynta ka surok Mawryngkneng bad Pommura ha East Khasi Hills District.
Katkum ka khubor bala ïoh lum na ki pulit la ïathuh ba kane ka met ïap ka dei jong u Pynkhreh Surong uba na ka shnong Mynsngat, West Jaiñtia Hills District, uba la jah naduh ka 9 tarik u Lber, 2023 ha ryngkat ka kali Mahindra Pick-Up ba dang thymmai.
La suba jur ba utei u samla rangbah ula shah pyniap ha ki runar thrang snam bad bret ïa ka met jong u ha katei ka bynta jong u surok bah. La suba jur ba u Pynkhreh ula shah pynïap sha kiwei pat ki jaka bad wan bret pat ïa ka metiap jong u ha katei ka khlaw hajan ka shnong Pommura, hadien kata kitei ki runar kila rong tuh noh ïa katei ka kali Pick-Up.
Halor kane ki pulit kila kem noh ïa ar ngut ki briew kiba suba donkti ha kane ka kam bad ki pulit kila rejister kes pyrshah ïa ki.
Ïa ka met jong u Pynkhreh Surong ki pulit kila pynkit noh sha sha Jowai Civil Hospital, Ialong ban leh ïa ka Post Mortem bad ka jingtohkit mynta ka dang ïaid shakmat.