Ki ar ngut ki nongri Dohkha ba paw jong ka Jylla kita u bah Jokin Kurkalang 50 snem ka rta na Mawkriah, Mawphlang bad u Khlainbor Pale 57 snem na Umkei, Umsning Ri Bhoi District, ki la shah pynkup burom da ki syrnot, ki khusnam, bad ki song pisa na ka bynta ki jingnoh synñiang ba radbah jong ki ha ka kam ri dohkha ha ka Jylla.
Ia kane ka jingpynkup burom ia kitei ki rangbah la pynlong ha ka jingrakhe jong ka National Fish Farmer Day 2024, ha ka 10 tarik Jylliew, 2024, ha Directorate of Coldwater Fisheries Research, Bhimtal, Uttarakhand bad ha College of Fisheries, CAU (I), Tripura bad kane ka wanhrah ia ka jingsarong ia ka Jylla Meghalaya bad ia ka tnad Fisheries.
Ia u Jokin Kurkalang la pynkup burom da ka khusnam “Progressive Fish Farmer Award” na Meghalaya ryngkat bad san ngut kiwei pat ki nongrep kiba kiew shaphrang jong ki Jylla Himalayan ha Directorate of Coldwater Fisheries Research, Bhimtal, Uttarakhand. Da ka jingkyrshan jong ka skhim Blue Revolution.
U Jokin u la trei ia ka kam ri dohkha da ka jingiarap ka juk stad science ha ka pung jong u kaba heh 1 hectare, ha kine ki 5 snem ba la dep da kaba pynmih dohkha shisnem haduh 3,000 kgs, bad pyniasoh lang ia ka jaka ri dohkha jong u bad ka aqua park bad ki kam pynbyrngia kum ka kinglieng, bad kiwei kiwei, kumta ka la nangkyntiew shuh shuh ia ka kamai jong u.
U Khlainbor Pale u la ioh ia ka khusnam “Best Fish Farmer” na Meghalaya ryngkat bad kiwei pat ki nongri dohkha jong ki Jylla ka thain shatei lammihngi ba la pynlong da ka College of Fisheries, CAU (I), Tripura ha ka jingiatreilang bad ka Seng Ri Dohkha kum ka North East Society for Fisheries and Aquaculture (NESFA) ka India. Kum u nongri dohkha u ba aiti lut, u ma Pale u la pyni ia ki jingjop kiba phylla ha ka liang ka Aquaculture naduh u snem 2019 ba la kyrshan na ka Blue Revolution Scheme. Lyngba ka jingpdiang jong u ïa ka rukom pynïaid ïa ki pung semi-intensive, kaba bniah bad ka rukom ai bam kaba ïaid beit, u la lah ban ïoh ïa ka jingpynmih dohkha kaba 2,600 kg ha u snem 2022, 2,800 kg ha u snem 2023, bad 2,400 kg ha u snem 2024, kaba dei ka jingjop ia ki jingeh kiba khraw ba u iakynduh.
