Ka long ka jingjia ka bym lah ban mutdur shuh kumno ki nongtuh bymlah ba tip ki lah ban rong da kaba suk ia kawei ka Synduk Nar buh pisa (Safe case) kaba khia haduh 2 Ton na ophis treikam jong ka KJP Assembly Book Room Jowai, kaba don mar pyrshah ka Thomas Jones Synod College, Iawmusiang, Jowai.
Ia kane la iathuh da u ma B.Tongper uba dei u nongpyniaid jong kane ka Book Room. U ma Tongper kumba ju long man la ka sngi haba poi ha katei ka ophis (Dukan die kot niam) jong ka KJP Assembly ha ka por 9:15 AM mynta ka sngi ula kyndit ban iohi ba ka jingkhang ba shadien jong kane ka ïing kala pra.
Haba ula jurip ia ka kamra kaba la buh ia kane ka Synduk Nar (Safe case) la lap ba ki nongtuh kila pynpait pynpra ia ki nar rod kiba la pyndait lang ia kane ka synduk bad ka kynroh.
U ma Tongper ula iathuh ba la antad kane kala jia ha ka por shiteng synniang mynta ka miet bad ka shimpor ia ki nongtuh da ki bun bun kynta ban pyndep ia kane ka kam jong ki. Ula iathuh ba ki nongtuh ki dang iohpor ruh ban shet ja shet jyntah hapoh katei ka kamra.
La iathuh ba kane ka synduk ka khia haduh 2 (Ar) Ton lane 2 hajar kilo, hynrei ym lah shuh ban mutdur ba ha kano ka rukom kine ki nongtuh kila rong ia ka da kaba suk, khlem da don kano kano ka jingpaid jong ka madan ïing ne kynroh ïing. “Ha ka por ba pynrung ia kane ka synduk nar hapoh kane ka ophis ka donkam haduh 20 ngut ki briew (Daju) ban rah ia ka”, kumta la antad ba kine ki nongtuh ki don da ka kynhun, la ong shuh shuh u ma Tongper.
Mar sien lap ia kane ka jingjia u ma Tongper ula leit ban buh da ka FIR hapoh Jowai Police Station bad ki Pulit kila shimti ia kane ka kam.
La iathuh ba hapoh kane ka Synduk ka don ka pisa kaba T.52 hajar lem bad kawei ka Mobile set. Hapoh jong kane ka Synduk ka don ruh ka jingthoh kaba la thoh “This box is purchase by Shri.B. Tongper on behalf KJP Assembly Rev. P. Hynniewta” ong u ma Tongper.
Na ka liang jong ki bor pyniaid jong kane ka Book Room ki kyntu ia baroh ki paidbah ba lada ki lap ia kino kino kiba tyrwa die ia kane ka Synduk kim dei satia ban thied ia ka, hynrei ki dei ban ai jingtip mar mar sha ki bor Pulit ba marjan lane sha ki nongpyniaid jong kane ka ophis lyngba kane ka mobile No.9436301389.