Kawei ka trok 12 shaka (tyres) kaba don u Registration number NL -01-AB-2061 kaba wan na ki thaiñ Ladrymbai ba la niah da u Onipaia Khynriam ka la leit syllad naphang ïa ki lai tylli ki kali rit ha surokbah national highway hajan ïew Khliehriat, ar tylli ki dei ki kali kamai Local Taxi bad kawei pat ka dei ka kali shimet kaba dang pynïeng harud surok ha Khliehriat.
La lap ba ki lai tylli ki kali rit kiba shah syllad kila ïatyngkhuh lang hajuh bad wanrah ka jingjulor kaba jur ïa kitei ki kali rit bad ki nongshong kali kiba shong ha ki ar tylli ki kali kamai ki la mynsaw bad la pynkit noh mar mar ïa ki sha Khliehriat Civil hospital ban ïoh ïa ka jingsumar, kane ka jingjia ka la jia mynta ka sngi ha ka por 12:50 baje mynsngi.
ïa ka trok kaba syllad lem bad u nongñiah jong ka la rah noh da ki Pulit pyniaid kali sha thanat Khliehriat Police Station.
Ki kali kamai kiba julor ha kane ka jingshah syllad pathar ha ka trok ki dei kiba don u Registration number ML-11-4452 ba la niah da u bah Friday Lyngdoh uba na Ladsutnga bad u la lait na ka jingmynsaw ba jur da ka jingïada ka Airbag bad u la shu mynsaw malu mala na ki bynta ka kti katba uba shong hapoh ka kali pat uba ym pat shym la ïoh kyrteng u la mynsaw na ki bynta ka khlieh bad la pynkit noh sha hospital Khliehriat, kiwei kiwei ki nonghsongkali kiba kynthup ki kynthei ki la mynsaw ha kane ka jingjia bad pynkit sha hospital, uwei pat uba niah ïa ka kali kamai kaba don u Registration number ML-11-6341, u ba la tip kyrteng kum u Emishwa Phawa, uba la lait na ka jingmynsaw hynrei tang kiba shong hapoh ka kali jong u ki mynsaw malu mala, kawei pat ka kali shimet ne kali private kaba dang pynieng harud surok ka dei kaba don u number ML-05-J-2441 ba la ñiah da u bah Herol Bareh uba na Sutnga, une ruh u lait na ka jingmynsaw katba ka kali pat ka la julor bun.
Katkum ka jingïathuh kiba ñiah kali bad ki paidbah kiba ïohi ïa kane ka jingjia ki la ong ba kane ka dei ka jingbakla jong uba ñiah ïa ka trok uba la shoh khawiang, la ong ruh ba wat utei uba ñiah ïa ka trok ruh u la phla ba u la dep dih kyiad kumta um shym la lah shuh ban tehlakam ïa ka kali bad u la leit syllad klumar ïa kitei ki kali kiba don ha surok bad ha rud surok ha Khliehriat West.
Ha kane ka jaka ba jia la don lang ruh u bah Kyrshan Blah, uba dei u President jong ka Meghalaya People’s United Front (MPUF) bad u President jong ka East Jaintia Taxi Owners and Drivers Association, u bah Tiplang Rymbai ha kaba ki la pynrem jur ïa ka jingleh khlem akor u bah Onipaia Khynriam, uba ñiah ïa ka trok bad syllad naphang ïa ki kali kiba dang ïaid bad kiba ieng ha surok, utei u nongïalam ka MPUF u kyntu ruh ïa kiba ñaih kali khamatm ki kali heh ba ha shwa ban poi ha ki jaka ba bun briew kum ki jaka ïew bad jaka ba don ki skul ki dei ban niah jai jai ïa ki kali.
U bah Kyrshan u la ong ba shen un sa leit ban ïakynduh ïa u Superintendent of Police, ka East Jaiñtia Hills District ban dawa ba dei ban bat No-Entry Shwa ïa ki kali heh ha ka por mynsngi bad ruh ban kham pynbun shuh shuh ïa ki pulit pynïaid kali ha Khliehriat khamtam ha ka jaka ïew bad ban dawa ruh ban don noh da ka tnat pulit ba paka ka ban peit bad pynïaid tang ïa ki kali ha sor Khliehriat.
