Kawei na ki bynta jong u surok bah ban poi na ka shnong Amlarem shaduh Pdengshakap, kaba don ha Amlarem Sub-Division, WJHD ka la kylla long thwei da ka jingshah tap ha ka umsaw jong u slap kaba la lang ha ki bynta ban bun jong u surok bah.
Une u surok u dei ruh u bud lum jong ki nongrep jong ki nongshong shnong ka thaiñ war Jaintia. Kane ka jingkylla thwei jong une u surok ha kawei na ki bynta ha shnong Amlarem ka la ktah ia ka leit ka wan jong ki paidbah.
Une u surok u dei uba pyniasoh ia shibun tylli ki shnong kum ka Amkhloo Jaralud, Amkhlo Pambthuh, Amtasam, Tarangblang, Pdengshakap, kumjuh shaduh Muktapur. Nalor ba u pyniasoh ruh bun ki jaka jngoh kai pyrthei kumjuh ruh u ba poi sha ka jaka pynmih bor ding ka MeECL ka Leshaka Hydel Project. U dei ruh u surok ban poi sha ka ophis treikam jong u SDO (Civil) jong ka Amlarem Civil Sub-Division, Amlarem.
Ha ki por slap la iohi ba une u surok u dap um katba ha ka por ba rang ryngkhiang pat une u surok u long uba khohruh khoram bad uba dap tang da ki thliew ki syar suda. Kane ka jinglong jingman jong une u surok baroh shisnem lynter kaba la neh mynta da ki bun bun snem ka ba la wanrah ka jingeh kaba khraw ia ki nongshong shong shnong kane ka thaiñ.
Na ka liang ki nongshong shnong ka thaiñ ki sngewdei ba ka sorkar kan shna pynbha noh mar mar ia une u surok khnang ba kan pynsuk ia ki nongleit nongwan bad ka kit ka bah lyngba une u surok.
