U Sub-Divisional Officer (Civil) jong ka Amlarem Civil, Sub-Division ula aibor bad shah ia u Secretary jong ka Muktapur Kali Puja Committee ban pyndep ia ka jinglehniam “SHRI SHRI KALI PUJA” ka ban long ha ka 4 tarik u November 2021 ha Muktapur Puja Temple da kaba kin bud ryntih ia baroh ki kyndon jong ka sorkar.
Katkum ki kyndon bad ki hukum sorkar kaba ki riew ngeit Hindu ki dei ban bud ha kane ka jinglehniam ka long ba kim bit ban pynsawa ia ki kor pynsawa palat ia ka 10 baje mynmiet. La khang ban thang ia ki pata ha ki lynti iaid kjat ne ki jaka paidbah, la khang ban die ia kino kino ki jingdih pynbuaid ha ka por ba dang rakhe ia kane ka jinglehniam Kali Puja.
La btah ba u Executive Magistrate bad u SDPO, Amlarem kin long ki nongkhmih halor kane jingpyntreikam ia ki kyndon jong ka sorkar ha ka por ba pyndep ia kane ka jinglehniam. Kino kino kiba ialeh pyrshah kin shah pynshitom katkum ki kyndon jong ka aiñ.