Ki nongïalam ka KSU SWKHD ki la shah ujor da ka ejahar ha u Syiem ka Hima Maharam hadien ba ki la ïakhih pyrshah ïa ka jingthmu u Syiem bad ka EC dorbar jong ka Hima Maharam ban ai jaka ïa ki shipai BSF ha Photmula, SWKHD.
Ki nongïalam ka KSU kiba la shah ujor ki kynthup ia u samla Forwardman Nongrem bad kiwei de ki dkhot kiba na SWKHD bad Mawkyrwat Circle.
Ha kaba ïadei bad kane, ki dkhot ka KSU South West Khasi Hills District ryngkat ka Dorbar Raid Sawsymper, ka seng HANM South West Khasi Hills District bad ka seng HITO South West ki la leit ban synran lang ïa ki nongïalam ka KSU ha Mawkyrwat Police Station hadien ba ki la shah khot ha ki Pulit ha ka janmiet jong ka 6 tarik u Nailur 2025 .
Na ka liang ka seng KSU ka la ujor kylla pyrshah ïa u Pa’iem Niandro Syiemiong da kaba kyntait ba ka KSU bad kiwei ki Sengbhalang kim shym la leh beaiñ hynrei ki la pyrshah ïa ka jingthmu ban ai ktem shipai da u Syiem ha ka lynti kaba jaijai bad ha ka nongrim jong u paitbah.
U samla Forwardman Nongrem haba kren shi lad pathai khubor u la ong ba ka jingshah ujor jong ki, kadei tang ka jingkynnoh bad kaba khlem nongrim bad khlem ki jingpynshisha.
U la ong ruh ba u Syiem u pyndonkam bakla ïa ka aiñ da kaba ujor khlem nongrim ïa ki dkhot ka KSU bad ïa kiwei kiwei ki sengbhalang tang na ka bynta ban pynsngapjar ïa ki bad ki paidbah haba ki kren pyrshah ïa ka jingleh jong u bad u la bynrap ruh ba kane ka long kaba beaiñ bad ki pulit ki dei ban shimkhia ban tohkit halor kane.
U samla Forwardman Nongrem u la ong ruh wat la u Syiem u pyrshang ban kynnoh nong leh kam sniew ïa ki nongïalam ka KSU bad pyrshang ban pyn ngat kyndon aiñ hynrei ka seng ka la shim ïa ka rai ba kan nangbteng ban ïakhih halor kane ka jingthmu ban ai jaka ïa ki BSF tad haduh ba u syiem un lum ïa ka Dorbar Hima bad ban weng ïa ka jingthmu ai jaka ïa ki shipai ha Photmula.
