U M.P. ka Rajya Sabha, Dr. Wanweiroi Kharlukhi u la pyntikna ba ka jingiakhun ban ioh ILP ha ka jylla ka long kaba duh jingkyrmen ban ïoh namar ka Sorkar pdeng ka la leh kyllut ia ki jingdawa ki briew na ka thaiñ Shatei Lam Mihngi (North East) naduh ki por ba mynshwa bad ruh namar ki MP na kine ki thaiñ kim don ia ka bor ha lade.
U Dr. Kharlukhi u la iathuh ruh ba ka jingdawa ia ki mat ba donkam jong ka thaiñ Shatei Lam Mihngi ka la jur bha ruh naduh ki por ba la long MP u Purno Sangma hynrei kitei ki jingdawa ki shu sah ha suiñ khlem treikam kawei ruh. Shuh shuh u la ong ba ki MP kiba kynthup ia ka Agatha Sangma, Vincent Pala bad Dr. Ricky Syngkon ruh ki la iai rah ia ki mat dawa ha kaba iadei bad ka jingpynrung ia ka ktien Khasi bad Garo sha ka Khyrnit ba 6, ka ILP bad kiwei kiwei.
Nalor kata u la ong ruh ba watla u la mihkhmat na ka NPP kaba dei ka seng kaba la ithuh ha ka ri (National Party) hynrei ki Jylla na ka thaiñ Shatei Lam Mihngi ki kham shah ieh beiñ.
U Dr. Kharlukhi u ong watla ki MP na kine ki thaiñ ki dei na ki party bapher bapher hynrei ki don pat kawei ka kynhun ia kaba la tip kum ka ‘North East M.P. Forum’, kaba dei ka seng kaba iatai bad iakren ia ki jingeh jong baroh 8 tylli ki Jylla ka thaiñ Shatei Lam Mihngi.
U la pynshai ruh ba ia ki mat kiba khia kum ka jingjia ha Manipur ym lah ban iatai lang hynrei ha kane ka seng la iatai tang ia ka roi ka par.