Bunsien ka sorkar ka ong ba u surok udei u bud lum jong ka roi ka par ha ka shnong ka thaw bad ka jylla, hynrei kaba shem jingeh pat ïa ki nongshong shnong ka long wat la ka sorkar kala dep ban mang ban shna ia u suruok hynrei ki Contractor ba ïoh pyntrei pat ki buh teng bad sangeh shiteng por ïa ka kam.
Kum kane kala jia ruh ha thaiñ War Jaiñtia, ha kaba u Contractor ban pyntrei ïa ka surok na shnong Kudengrim shaduh Kudeng Thymmai, kaba hap hapoh ka Amlarem Civil Sub-Division, West Jaiñtia Hills District u la iehnoh ïa ka kam shiteng por khlem da pyntrei haduh kine ki sngi.
Ïa une u surok na Kudengrim sha Kudengthymmai la buh mawnongrim ban shna da u MLA ka thaiñ u Bah Lahkmen Rymbui ha ka 30 tarik u Nailar, 2022 bad ka jingshna ïa u tei u surok uba jngai 5.14 KM na Kudengrim sha Kudengthymmai ïa kaba la bei tyngka da ka New Development Bank (NDB) lyngba ka Meghalaya Eco Tourism Infrastructure Development Project (METIDP) kaba kot sha ka 18.53 klur tyngka bad ka thong ban pyndep ia u surok kan long haduh ka 5 tarik u June, 2025 katkum ba paw ha ka DPR bad ka Public Works Department (PWD) kum ka implementing agency jong kane ka projek, katba ïa kane ka projek la ïoh ban pyntrei da ka Bah Khlurstep Pakma kum u Contractor.
Kumba long mynta ka thaiñ Kudengrim kala long shisha ka shnong kaba riewspah bha da ka jingdon ki jaka jngohkai pyrthei kiba itynnad, naduh ki lum ki wah, ki jingkieng jri nalor kiwei de.
Hynrei mynta ki paidbah jong katei ka shnong kila shem jingeh na ka jingpyntrei ïa utei u surok na Kudengrim sha Kudengthymmai namar ka jingsangeh noh u Contractor ïa ka kam, nalor ka jingdap ktieh ka surok kaba la khanglad ïa ki kali rit ban ïaid lynti.
Ki nongshong shnong naduh u Waheh Shong ka Kudengrim ma Mondew Pohtam ha ka jingkren sha ki lad pathai khubor ha ka jingleit jurip ïa u surok ha ka sngi saitjaiñ jong ka 29 tarik, ula ong ka jingiehnoh syndet jong u Contractor ïa ka kam kala wanrah jingeh ïa ka shnong hi baroh kawei bad kumjuh ïa ki shnong ba marjan.
Ula ong haka por slap ka jingbtuid jong u surok ha shwa ban rung shapoh shnong kala jur bha, wat na ka liang ka shnong kala dep ruh ban ujor sha u Contractor kumjuh sha ki ophisar ka tnad PWD hynrei ym shem la sngap ïa kane ka jingeh. Tang ban lait ka jingïaid ki kali, ki nongshong shnong kila hap ban leit pynkhuid dalade ïa ka ktieh bad ïa ki maw heh kiba hap hapdeng surok.
Shuh shuh u ong ka por mynta ka donkam bha ïa u Contractor ban wan pynkhuid noh ïa ka ktieh ha ki bynta ka surok ha shwa ban poi sha ka shnong, ula ong ka jingwan jong kane ka projek lyngba u surok Kudengrim sha Kudengthymmai kala wanrah ka jingkmen kaba khraw eh ïa ki nongshong shnong, hynrei ka kam pat ka dang sangeh bad sahteng la ar snem mynta naduh bala buh ïa u Mawnongrim.
La pynsngew da ki trai shnong lada dep ban pynshna ïa u surok Kudengrim sha Kudengthymmai kan long ka jingmyntoi kaba khraw eh namar kim donkam shuh ban leit shaduh Amlarem kaba jngai 26 kilo miter eiei hynrei lyngba kane ka surok kala pynduna ruh ïa ka jingjngai ban poi sha ka jaka sumar CHC bad College kaba don ha Nongtalang bad sha ka surokbah NH 40 (E) ban poi sha Dawki.
Ki Waheh Shnong ka thaiñ naduh u ma Kolmen Pohshan uba dei ruh u Adviser ka Synjuk ki Waheh Shnong ka War Jaiñtia, u Waheh Shnong ka Sohkha Shnong ma P.S Suchen, Waheh Shnong ka Lamin ma Golden Gashnga bad u Waheh Shnong ka Kudeng Thymmai ma Barister Paswet kila pynrem jur ïa ka jingbym shimkhia jong utei u Contractor ban trei ïa ka kam kaba la sah teng la 2 snem mynta bad kala buh jingeh ïa ka leit ka wan ki paidbah.
Shuh shuh kitei ki nongïalam shnong kila kren shai lada utei u Contractor um lah shuh ban trei ïa ka kam, ula dei ban weng noh shi syndon ïa ka kam, khnang ba ka sorkar kan ïoh ban khot tender noh da kaba thymmai.
Kumba long mynta ki paid nongshong shnong jong katei ka War Jaiñtia kila sngew donkam ban pyndep kloi ïa utei u surok uba lah ban wanrah shibun ki jingmyntoi naduh ka leit ka wan, ka kit ka bah ban pynpoi ïa ki mar rep, ka koit ka khiah, ka pule puthi bad ka kam jngoh kai pyrthei.
Ha kajuh ka por kila buh ka jingkyntu ïa u MLA ka thaiñ u ma Lahkmen Rymbui ba un sngewbha ïarap lem ban buddien ïa kane ka kam khnang ba kan long ka jingmyntoi ïa ka shnong Kudengrim, Kudengthymmai bad ïa bun tylli ki shnong ba kynthup naduh ka Konglah, Nongbareh, Amkoi bad kiwei de.
