Ki dkhot jong ka MeECL Progressive Workers ryngkat ka jingialam jong u President Mantiphrang Lyngdoh Giri, mynta ka sngi ka 19 tarik Naitung ki la leit ban rah ia ka jingthoh ba la rai da ka High Court sha ka ophis jong ka MeECL kaba don ha Lumjingshai Shillong.
Kum ban shu pynkynmaw, ka Seng MeECL-PU ka la sdang treikam ha u Nailur 2017 bad ka daw ba la seng ia kane ka kynhun kadei na ka jingleh shilliang jong ka MeECL halor ka jingsiew. Hadien 3 snem tam ba ki la iakhun ia kane ka kam hapoh High Court lyngba ka jingiarap jong ka Kong Anjela Rangad, ka Court ka la sngewdei ban pdiang ia ka jingkyrpad bad ka hukum ruh ba ka ophis MeECL kan pyntreikam ia ka ‘jingsiew kaba kat kum ka kam’ hapoh 2 bnai.
Katkum ka jingkren jong ka Kong Angela la ong ba kumno kine ki nongtrei kontrak ki ioh duna ka jingsiew haba ka kam ki trei kumjuh “mynshwa ki ai ha ka dor bylla sngi bad ia katei ka dor ba la buh ruh ym ju ioh tikna bad katkum ka aiñ dei ban pynkiew man u snem” ong ka Kong Rangad.
Ha ka jingioh iakren markhmat bad u President ka MeECL-PU, u la pynpaw ia ka jingsngewnguh na ka bynta ka High Court bad ia i Kong Anjela kiba la lah ban pynurlong ia kane ka jingangnud kaba la slem. U la iathuh ruh ba kumba 1300 tam ki dkhot ki la ioh kattto katne ki jingmyntoi hadien ba la sdang ia kane ka kynhun ha u snem 2017.
