Ka 9-Lad kaba dei ka pdeng jong ka Nongbah, shen kan sa kylla dur na ka jinglah jong ka Tnad pynroi Sor (Urban Affairs) jong ka Sorkar Jylla ban pynbiang bad shna ia ki dukan na ka bynta ki nongdie madan kiba la pynkhapngiah ia katei ka jaka. Ka jingshlei ki nongdie madan ha 9-Lad ka wanrah ruh ia ka dheng kali bad ka buhrieh ruh ia ka jingitynnad jong ka Sor.
Lyngba katei ka buit, shen yn sa ioh ban sakhi biang ia ka jingkylla dur jong ka Nongbah hadien phew snem. U Bah Paul Lyngdoh uba dei u Myntri ba khmih ia ka tnad Arts & Culture, Social Welfare, Textiles, bad Tourism u la pyntikna ba ka jaka na ka bynta ki nongdie madan la dep ban shna pura bad ia mynta yn ap satang ia ka tarik na u Symbud Myntri Rangbah, Bah Sniawbhalang Dhar uba dei u Myntri ba khmih ia ka Tnad pynroi Sor na ka bynta ban pyllait noh ia kitei ki dukan.
U Bah Paul u la iathuh ruh ba la ioh ia ka jingithuh ia katto katne ki nongdie madan bad la pdiang ia ki ba kin shimti ia kitei ki dukan. Shuh shuh u la ong, kumba 200 ngut ki nongdie madan ki la dep ban pyntikna ia ki kyrteng ba kin ioh jingbit na ka bynta ban pynkynriah na 9-Lad sha katei ka jaka ba thymmai. U Myntri u la pyntikna ba ia kitei ki dukan la shna ha ka rukom kaba itynnad, ba bha bad ba skhem.
Nalor kata, u la ong ruh ban pynsuk bad pynmyntoi ia ki nongshong dukan la pynbiang ruh ki painkhana, ka um bad ka bording ba paka.