U ma Wailadmiki Shylla, MLA ka Jowai Constituency bad u Chairman ka MUDA mynta ka sngi Thohdieng haka jingleit buddien ïa ka jingpyntrei ïa ka Mini Secretariat ha Jowai, ula ong ba ka thong ba ha khmat eh ka jong u ka long ba “Kano kano ka kam kaba la sdang ban pyntrei u kwah ba kan dep hapoh ka por”.
Shuh shuh u ong la tei ïa kane ka Mini Secretariat ha Jowai (PWD Campus) kaba dei ka District Headquarter jong ka West Jaiñtia Hills haka jinglut kaba 20 klur, ïa kaba la bei pisa da ka sorkar jylla bad ka kam mynta kala ïaid bha shakhmat la kumba 85 percent bad kaba sah ka long satang 15 percent.
Haba kren sha ki lad pathai khubor, ula ong hadien ka jingïakren bad u Contractor la kumno kumno ïa kane ka Mini Secretariat lah ban aiti noh sha ka tnad ba dei peit ha u bnai Lber jong ka snem ban wan 2026.
U kwah ban pyntip sha ki paidbah katkum ka original plant jong kane ka Mini Secretariat ha Jowai ki don haduh lai tylli ki Block, kaba tei mynta ka dei ka ‘West Block’ bad kaba sah ka long sa ka ‘East Block’ bad ka ‘North Block’. Ka sorkar kala shim ïa kane ka rai ban pyntrei noh da ka kyndon ‘Phase-wise’, namar ka jingduna pisa hashwa ka Election bad la sanction pisa shwa tang ïa ka ‘West Block’.
U ma Wailad ula ong kumba long mynta ka pisa kaba dang sah ka long sa 29 klur naka bynta kitei ki Block bad kum u MLA ula pynsngew ïa kane hapoh ka ïing dorbar thaw aiñ jong ka jylla lyngba u Myntri Rangbah ka sorkar jylla uba la kular ban pyndep ïa kane ka sanction kaba dangsah.
Ka jingpyndep ïa kane ka Mini Secretariat ha Jowai (PWD) kan ïarap shibun eh ban lait na ka jingkhapniah khamtam ha DC ophis bad shibun ki tnad ophis yn pynkynriah sha kane ka Mini Secretariat bad kane kan pynsuk shibun eh ïa ki paidbah kiba leit donkam, la ong u ma Wailadmiki Shylla.
