Ka myntri ka tnad ka koit ka khiah ka Dr. M. Ampareen Lyngdoh hynne ka sngi ka 3 tarik Nailur 2025 ka la pynbna ba ka National Medical Commission (NMC) ka la ai ia ka jingmynjur ba ka Shillong Medical College kan sdang treikam noh, bad ka long kaba kongsan tam ia ka jylla .
Haba kren sha ki lad pathai khubor ka Myntri ka tnad ka koit ka khiah ka la pyntip ba Shillong Medical College kan sdang treikam ha une u bnai September.
Shuh shuh ka la ong ba medical College kan sdang treikam noh ha une u snem bad yn sdang shwa da 50 ngut ki samla pule.
Kumba ka long mynta ka jylla Meghalaya ka don haduh 94 tylli ki seat ba la mang na ka bynta ki samla pule jong ka jyll ha ki jaka pule kum ka NEIGRIHMS, RIMS, bad ka Tripura Medical College. Ka la ong ka jingwanrah ia ka Shillong Medical College kan long ka jingiarap bad ka jingmyntoi ia ki samla pule Doctor ba kin bteng ia ka jingpule Doctor ha ka jylla la jong.
Ia kane ka kolej la buh kum ka “Ground Field College,” kaba ailad ia ki hospital kiba don hapoh ka jingjngai kaba 8 kilomitar ban treikam kum ki hospital hikai, kaba weng noh ia ka jingdonkam ban shna ia ka jaka ai jingsumar kaba thymmai.
Halor ka jingpynkhreh haba iadei bad ki nonghikai ha kane ka Medical Collge ka Dr. M Ampareen Lyngdoh ka la ïathuh ba na ki 16 tylli ki kam professor ba la mang 8 tylli la dep ban pyndap, nalor kata la thung 17 ngut ki Associated Professor, 25 ngut ki Assistant Professor, 20 ngut ki heh ophisar, bad 12 ngut ki nonghikai bad ki nongpyni kiba kynthup ia kiba bun ki kam hikai.
Ka la ban jur ba ka jingbuh ïa ka medical college kan ïarap shibun ban weng ïa ka jingduna doktor ha kylleng ki hospital sorkar ha ka jylla.
Khatduh ka la pyntip ba u Myntri Rangbah ka Jylla u Conrad K. Sangma u don ha New Delhi ban khot dalade ïa u Myntri Rangbahduh ka ri u Narendra Modi ban wan plie ïa kane ka Shillong Medical College.
