U Myntri Rangbah ka jylla Conrad K. Sangma ryngkat bad ka kynhun ha ka 1 tarik Rymphang 2025 ki la leit sha ka Shnong Saw-Mer Upper Shillong na ka bynta ban iakynduh markhmat ia ki nongshong Shnong bad ki dkhot ka Dorbar Shnong ban iakren, ban iatai bad ban sngap ia ka jingeh jong ka shnong bad ki dong ba marjan.
San sngi shwa ba u Myntri Rangbah un wan ha kane ka dong, u la pynlut por ruh bad ki nongshong Shnong ka thaiñ South West Khasi Hills District ha Ranikor kaba dei ruh shi bynta jong ka projek Grassroot Connect.
Ha kane ka sngi ba u la hiar hi da lade sha katei ka jaka, la ioh ia ka jingiakren ba markhmat ha kaba ki longkmie bad ki samla ruh ki la pynpaw ia ki katto katne ki mat kiba dei ruh ki jingeh bad ki jingiaid lynti ba donkam ban weng bad ban pynioh ha kane ka thaiñ.
La ioh iakren ruh ia ka jingeh ba mad halor ka jingjyllei u drok, ka jingdonkam ban kyntiew ia ka kam ïalehkai (sports) bad ruh ia ka jingangnud ban pyndep kham kloi ia ka surok kaba dang shna mynta kaba iaid lyngba ka thaiñ upper Shillong.
Na ka liang u Myntri Rangbah u la pynpaw ia ka jingkmen ban sngap ia ka jingdonkam jong ki paidbah ka shnong bad ruh u la mynjur ban don ryngkat bad ka shnong kum u Nongïalam ha kano kano ka bynta.
Ha kane ka sngi u la leit ban ïashim bynta ruh ha ka ‘Choir Competition bad Food Fest’ ba la pynlong da ka Seng Rangbah Katholik Saw-Mer kaba dei ruh shi bynta ka jingrakhe ia ka jingdap 25 snem kane ka seng ha Sunny side, Saw-Mer.
