-1188 klur yn pynlut ka Sorkar Jylla ïa ka Secretariat ba thymmai-
Ka Jylla Meghalaya ka la ioh ia ka kabu ban pdiang (host) ia ka lympung National Games ha u snem 2027 bad na ka bynta ka jingbit jingbiang la pynkhreh ruh ban pynitynnad ym tang ia ki madan bad ki jaka ïalehkai hynrei la ïakhun ruh ban pynitynnad ia ka sawdong sawkum khamtam ia ka Wahumkhrah kaba tuid kylleng ka Nongbah.
Ha kane ka jingpynkhreh hapoh ka jingialam jong u Myntri Rangbah Conrad K. Sangma, ka Sorkar Jylla ka la pyrshang ban pynkhuid ia ka Wahumkhrah da kaba ker sainar ha baroh ki jaka ba katei ka Wah ka iaid lyngba.
Ha kane ka sngi, u Myntri Rangbah u la leit ban jurip ruh ia ka Secretariat kaba dang shna thymmai mynta ha Umsawli, New Shillong ia kaba la buh mawnongrim ha ka 21 tarik Kyllalyngkot 2025. U Myntri Rangbah u la iathuh ba katei ka ophis treikam ba thymmai la buh thong ban pyndep ha u snem 2027 ha ka jinglut kaba la mang 1188 klur.
Haba iaid lyngba ki surok ba la shna thymmai bad ki surok ba dang pynnheh thymmai ha New Shillong, u Conrad u la ong ba kitei ki surok kin pynsuk ruh ia ki Nongleit Nongwan namar ka jingkylluid bad khamtam bna la shna ban pyniasoh sha ki Shnong bapher bapher. U Myntri Rangbah u la bthah ruh ba dei ban thung ia ki dieng narud jong kitei ki surok khnang ba kan pynitynnad shuh shuh ia kitei ki thaiñ. Nalor kata, u Sangma u la iathuh ruh ba yn shna ruh ia ki Unity Mall ha kitei ki jaka.
Ha kane kajuh ka sngi, u Myntri Rangbah u la leit ban sakhi hi da la ki khmat ia ka Building ba thymmai ha Polo kaba dei ka Ïew kaba la shna kyrpang ha ka rukom kaba itynnad ia kaba la buh thong ban plie noh mynta u snem.