Ki khynnah skul ba pher bapher kiba don hapoh ka West Jaiñtia Hills District mynta ka sngi 26 tarik u Naiwieng kaba dei ruh ka ‘Constitution Day’, kila ïashim bynta lang ban pule ia ka Preamble jong ka Riti synshar jong ka Ri India (Samvidhan Diwas), kaba long ruh shi bynta na ka jingbthah na ka Ministry of Education, Department of School Education & Literacy, New Delhi.
Na ka liang ki nonghikai kila pule ïa ka Preamble bad la batai sha ki khynnah skul shaphang ka Indian Constitution, da kaba pynkynmaw kyrpang ïa ka kyrteng bad ka nam jong u Dr. BR Ambedkar uba long uwei na ki nongïalam khmat ha ka Drafting Committee.
Ka thong ban pynlong ïa kane ka sngi ka long shi bynta ban ai jingtip sha ki khynnah skul bad kumjuh sha ki paidbah shaphang ka Riti treikam ka Ri kaba dei ka hok ban iada ia ki nongshong shnong baroh, haka juh ka por ka long ruh ka sngi kynmaw burom ïa ki dkhot ka Drafting Committee jong ka.
