Ki khynnah skul ka Khimusniang Presbyterian Secondary School, Jowai mynta ka sngi ki la ïoh lad ban ïashim bynta shitrhem ha ka “Exhibition Cum Sales Day” jong ka Skul, kane ka Exhibition ka long shi bynta ban pynmih pisa ha ka ban shna pynheh (Extend) ïa ki kamra klas jong ka skul.
Ïa kane ka prokram la wan ban plie pyrda da u kongsan uba dei ruh u Chairman jong ka Balang Presbyterian Khimusniang, Jowai u Rev. K. Syiemlieh ha ka jingdonlang ka Headmaster jong ka skul ka kong Widawan Nangleiñ kaba la ai ki kyntien pdiang sngewbha ïa baroh, nalor ka jingdonlang ki ki kmie ki kpa, ki nonghikai bad ki khynnah skul. Katba ïa ka jingïalang la pynïaid da u TBn. P.L. Dkhar ha Jubilee Halls jong ka Balang.
Ha kane ka Exhibition Cum Sales ki khynnah skul kila wanrah ïa ki tiar ki tar bapher bapher ba la shna kyrpang, ki jingbam ba bun jait, ki jingdro dur bad kiwei kiwei de.
U kongsan Rev. Syiemlieh haba ai jingkren ula kyntu jur ïa ki khynnah skul ba kin long kiba mihnot bha ha ki jingpule kot bad ha ka juh ka por lyngba ka jingdon kum kine ki prokram pyninam kala ïarap shuh shuh ïa ki khynnah skul ba kin pynpaw pyrthei ïala ki sap ki phong ba ki don, kane kan ïarap ruh ban kyrshan pisa naduh ka tulop ki nonghikai bad kiwei de ki jingdonkam.
La pynphuh pynphieng shuh shuh ïa kane ka Exhibition da ki jingïalehkai ban pynbyrnia naduh ki Fancy Dress bad ki jingshad kibapher bapher.
Hashwa ban sdang ka prokram la ïoh ban pule na ka ktien jong U Blei na uwei na ki khynnah skul u Bethwellsing Hua bad ka jingduwai na u babu Ioomanmi Bang, katba ïa ki kyntien ai khublei la ïoh na u nonghikai babu P. Karsyntiew.
Ïa kane ka Exhibition Cum Sales Day jong ka skul yn pynkut ha ka por 5 baje janmiet mynta ka sngi.
