Ki khynnah skul ha West Jaiñtia Hills District ha ka thong jong ka World No Tobacco Day Programme 2025 ba kynthup ïa ka Signature Campaign bad ka Tobacco Rally ki la mih ban ïashim bynta shongshit ha man la ki shnong ki thaw jong ka Thadlaskeiñ, Laskeiñ bad Amlarem Block.
Da ka jingsngewkhia ïa ki jingsniew bamih na u biri, sikret, duma bad kiwei ki jait jingbam bashna na u duma, ki khynnah skul ha ryngkat ki nonghikai ki la ïamih sha surok ban pyrta ryngkat ka jingrah ïa ki jingthoh kiba long shibynta ka jingsam jingtip ban pynsngewthuh ïa ki paidbah shaphang ki jingsniew bad ki jingpang bamih na ka jingpyndon kam ïa u biri, sikret bad duma.
Kum ban pynkynmaw ka Tobacco Free Educational Institution (TOFEI) ka dei ka prokram baba la sdang hapdeng ka jingïatreilang ka Ministry jong ka Health Department bad ka Ministry jong ka Education Department bad ha une u snem kane ka prokram kala ïaid lynti la kumba 4 snem, ka Jylla Meghalaya ha u snem 2023 ka long kawei na ki Jylla jong ka Ri India kaba paw hapoh ka dew bah Asia da kaba ïoh ban rah ïa ka WHO WNTD South-East Asia Region Award.
Na ka liang ka kong M. Lakiang, District Mission Coordinator, SSA West Jaiñtia Hills ha ka thong jong ka WNTD 2025 na ka bynta ka burom jong ka District bad ka Jylla baroh kawei ka kyrpad bad wer ïa ki bor pynïaid jong ki skul baroh hapoh ka West Jaiñtia Hills District ba kin shimkhia ban ïasnohktilang ha ka ban pyndep ïa ka TOFEI Activities kumjuh ruh ïa ka Tobacco Rally bad ka Signature Campaign ka ban kut haduh ka 20 tarik u Jymmang, 2025.
