Ha Amlarem ia ka jingrakhe Independece Day la pynlong da ka ophis treikam jong ka Amlarem Civel Sub-Division bad la pynlong ia ka ha madan ialehkai jong ka Amlarem Sub-Division Sport Association Mini Stadium, ha kaba u ma MLA ka thaiñ u ma Lahkmen Rymbui ula long u kongsan ban pynher ia ka lama ka ri bad shim ruh ia ka salute jong ki 7 kynhun ba kynthup ia ki Pulit bad 6 tylli ki skul.
Hadien jong ka prokram la don ka jingpynkup burom ia ki nongtrei ANMs bad Anganwadi. Ka kong Lady Khonglah ANM jong ka Syndai HWC-SC hapoh ka jingpeit ka Pdengshakap PHC bad ka kong Dainelawanris Nongrum ka ANM jong ka Muktapur hapoh ka jingpeit jong ka Dawki PHC kila shah pynkup burom.
Na ka liang jong ki nongtrei Anganwadi kiba la shah pynkup burom ki kynthup ia ka kong Lamjingshai Pohshna na Padu Mawsku jong ka Jaraiñ Sector kaba la ioh ia ka khusnam ‘Anganwadi best performance’. Ka kong Quissila Khonglah na Sohkha Model hapoh ka Nongtalang Sector kala ioh ia ka khusnam ‘Top performance’ bad ia ka kong Aibanshngain Kassar na Pdengshakap North hapoh ka Pdengshakap Sector ka la ioh ia ka khusnam ‘Good Performance’.
La sam khusnam ruh ia ki nongdie rashon halor ka ‘Top performance on online transation’ ba la ioh da u bah Diwelson Mukhim na Nongtalang Amsohmeheleng, u bah Justifield Pohkyrnu na Trangblang bad u Benediction Buam na Muktapur C.
La sam ruh ia ka khusnam ‘Top performance on RC seeding’ sha u bah Shylla Pohshna, Pdengkarong, ka kong Aibanri Khongsdir, Dawki, bad u bah Resting Tariang na Jong-U-Shen. Ia ka nam ‘Top performance on beneficiary seeding’ la sam sha u bah Bareh Pohrmen, Shnongthymmai (Nongtalang), u bah Firstly Joy Dhar, Lamin, bad ka kong Anna Mukhim, Padu B.
La sam ruh ia ki Certificates sha baroh ki nongiashim bynta March Pass contingents, kumjuh sha baroh ki nongiashim bynta ha ka prokram bapher bapher.
