Shangpung: Ka HNPF West Jaintia Hills mynta ka sngi ka la leit ia kynduh ia U Asst. Executive Engineer jong ka Shangpung Distribution Sub-Division u ma W. Dkhar ban pynpaw ia ka jingsngewkhia halor ka jingeh jong ki paidbah jong ka thaiñ kiba hap hapoh Shangpung Sub-Division namar ka jingkiew palat ka bill light ha man la u bnai.
Ka seng hadien ba ka la ioh jingtip bad ka jingud na ki paidbah ka thaiñ halor ka jingeh ba ki iakynduh ha ka rukom siew bill light, kumta mynta ka sngi hapoh ka jingialam u President jong ka u Newoneborn Suchiang bad u ma Kros Syntem ha ka jingiadonlang u Chairman ka JAC Ri Loom Jaintia u Paila Kordor Lyngkot, ki la leit ia kynduh ia u Asst. Executive Engineer jong ka Shangpung Distribution Sub-Division u ma W. Dkhar ha kaba kitei ki nongialam ki la pynpaw ia ka jingsngewkhia halor ka jingeh jong ki paidbah jong ka thaiñ kiba hap hapoh ka Shangpung Sub-Division namar ka jingkiew palat ka bill light man la u bnai. Ka seng ka pynpaw ba ki ba bun hi ki long ïing ki dei ki nongrep bad ki nongbylla sngi ki ba hap ban siew tam ia ka bill light wat ha ba kim pyndonkam ia ka light ruh.
Ha ka jingiakren jong ka Seng bad u Asst. Executive engineer jong kane ka Sub-Division u la kubur ba ka bill light ka la kiew shisha bad na ka liang ka ophis ka dang wad ki lad kumno ban pynbeit ia kine ki jingeh jong u paidbah. Ka seng ka la ai ruh da ka jingthoh halor kane ka jingeh jong u paidbah ha ka jingiadei bad ka jingkiew palat ka bill light.
Ka Seng ka la ai khublei ruh ia u Asst. Executive Engineer jong ka Shangpung Distribution Sub-Division ba u la iarap ban pynbeit bad ban iarap ia ki paidbah halor kane ka kam. Kane ka long katkum ka khubor ba la pyllait da u ma Newoneborn Suchiang, President HNPF West Jaintia Hills.