U MDC jong ka Langkyrdem- Laitkroh na ka Seng VPP, u la jop da kaba suk ia ka Shuki Chief Executive Member (CEM) jong ka Khasi Hills Autonomous District Council (KHADC) mynta ka sngi.
Na ka liang u Lamphang ka ïing Dorbar KHADC u la pynbna, ba hadien ba lah dep ban peit bniah ia ki kot ki sla bad bym don mano ba ialeh pyrshah ia ka shuki CEM u Bah Shemborlang Rynjah u la long u khlieh duh jong ka Executive Committee hapoh ka Council u ban peit bad pyniaid ia ka council baroh kawei.
Hadien ba lah dep ban pynbna na ka liang ki Dkhot jong ka ïing durbar ki la ai khublei kitbok kitwriang ia u CEM ba thymmai jong ka council, bad kyntu ban peit lang ruh ia ka khia, ka shon jong ki kum ki MDC haba ki wan ban ud nam sha u kum u khlieh jong ka council.
Kiba la shim bynta ki khynthup ia u Nongialam barim ka liang pyrshah u bah Titos Chyne u ba dei u MDC na Sohra Constituency, u ba la long u dkhot barim hapoh ïing, ryngkat ka kong Grace Mary Kharpuri MDC ka Nongskhen constituency kaba lah dei ka Dkhot ba lah jop sawsien kum ka MDC, u MDC ka Mawhati constituency u bah Kynjonglang Rangtong, u MDC ka Nongthynmai constituency u bah Winston Tony Lyngdoh ki ai khublei kyrpang ia u CEM ba thymmai u Bah Shemborlang Rynjah.