Mynta ka sngi u Syiem jong ka England u King Charles III ula pynskhem ia u Rishi Sunak kum u Prime Minister ka ri Britain hadien ka jingiehnoh kam ka Liz Truss kaba la bat tang 40 sngi ia ka kam PM katei ka ri.
Hadien ka jingshah jied jong u Rishi Sunak kum ki nongialam jong ka Party jong u ka Conservative Party, na ka liang jong u King Charles III ula khot ia u ban thaw noh ia ka sorkar jong ka Britain hapoh ka jingialam jong u. Dei mynta ka sngi ba u Sunak ula shimti ia kane ka kam Prime Minister jong ka ri Britain.
U Rishi Sunak ula long u PM ba khynnah duh jong katei ka ri bad u don mynta 42 snem ka rta.
Khyndiat shaphang u Rishi Sunak:
U Rishi Sunak u dei u jait bynriew nong India bad ha shwa jong ka jingpyniakhlad hapdeng ka India bad Pakistan, ki ba haïing jong u ki sah ha kawei ka shnong nongkyndong ba kyrteng ka Gujranwala bad mynta kane ka shnong kala hap hapoh Pakistan. Ki ba haïing jong u Sunak kila mih noh na Pakistan bad leit sahwir shipor ha Delhi ha ka por jong kane ka jingpyniakhlad hapdeng ka India bad Pakistan. Hadien kata ki kmie ki kpa jong kila leit sha Britain.
Ia u Sunak la kha ha ka 12 May 1980 ha Southampton (England). Ula pule ia ka Politics bad Economics ha Oxford University. U la iashong kurim bad ka Akshata Murthy ka khun jong uwei na ki heh spah ba paw u Narayan Murthy. U Rishi Sunak ula shah jied haduh san sien kum u Member of Parliament jong ka British Parliament. U long ruh u wei na ki MP kiba riewspah tam jong ka ri Britain. U Rishi u don ia ka jingdon jingem kaba shongdor Rs.7300 klur tyngka.
U Rishi Sunak u dei u nong India ba nyngkong duh ban shimti ia ka shuki Prime Minister jong ka ri Britain.