U Jyotiraditya M. Scindia ha ka 12.06.2024 ula shimti kum u Myntri ka sorkar pdeng ban peit ia ka tnat Development of North Easter Region (DoNER) ne ka thaiñ shatei lammihngi ka ri India.
Na ka liang jong u Dr. Majumdar uba dei u Myntri Khynnah jong ka DoNER ha ryngkat ki heh sorkar jong ka kane ka tnat kila pdiang burom ïa u Scindia. Na ka liang jong u Scindia hadien ba ula dep ban shimti ïa kane ka kam, ula pynlong ïa ka jingïakynduh ïa ki heh sorkar jong kane ka tnat ha kaba la ïakren bad ïatai halor ki skhim pynroi kiba pher bapher na ka bynta ka thaiñ North East.
Haba ai jingkren sha ki lad pathai khubor u Scindia ula ong ba Myntri Rangbahduh barabor ula buh hakhmat eh ban wanrah ïa ki kam pynroi sha ki bynta jong ka North Eastern Region, kumta na ka liang ka tnat ruh kan shimkhia ban pynurlong ïa kine ki jingkwah jong u Myntri Rangbahduh.
“Ka dei ka kamram jong ngi ban kyntiew ïa ki kam pynroi pynpar hapoh kane ka thaiñ bad wanrah ïa ki lad pynroi kiba katkum kane ka juk kaba mynta” la ong shuh shuh u Scindia.